Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 503 Hüküm no: 659 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa’nın evine yaptığı eklemenin tahta perde ile kapatılması gerektiği Bâ-mühr-i efendi Ma‘rûz Sâdır olan fermân-ı âlîlerine imtisâlen cânibi- şer‘-i garrâdan irsâl olunan keşif nâibimiz Hıfzı el-Hâc Mehmed Efendi dâ‘îleri hâssa mimârı hulefâsından el-Hâc Mustafa Halîfe ile Kapan-ı dakīk dâhilinde Salih Paşa mahallesinde vâki‘ mahall-i nizâ‘ın üzerine varıp huzûr-ı Müslimînde akd eylediği meclis-i şer‘de sâhib-i arzuhâl Ali Çelebi meclis-i ma‘kūd-ı mezkûrda derûn-ı arzuhâlde mastûrü’l-ism olup bir bâb mülk menziline mutasarrıf olan câr-ı mülâsıkı Mustafa muvâcehesinde işbu mu‘âyene olunan tahte’s-semâ bin yüz kırk senesinde Havva nâm hatun binâ ve ihdâs ba‘dehû âhara ve ba‘dehû işbu Mustafa’ya bey‘ ve hâlâ mezbûr Mustafa tahte’s-semânın ta‘mîrine mübâşeret eylediğinden mâ‘adâ tûlen dört zirâ‘ altı parmak ve arzen bir zirâ‘ on sekiz parmak ziyâde ilhâk ve benim makarr-ı nisvân olan mahallerime nezâreti ve zarâr-ı mübeyyen-i fâhişi olduğundan mâ‘adâ kiremit üzerine tahte’s-semâ ihdâsı mugāyir-i emr-i âlî olmağla vech-i muharrer ihdâs olunan tahte’s-semâ kal‘ ve hedm olunmak matlûbumdur deyü ba‘de’d-da‘vâ ve’n-nazar zarâr-ı şer‘îsi müte‘ayyen oldukdan sonra tavassut-ı muslihîn ile mârrü’z-zikr tahte’s-semâ ziyâde ilhâk eylediği mahallini kat‘ ve etrâf-ı selâsesini dolma duvar ve sıva ve bir tarafına tahta perde havâle çekmek ile zarâr-ı şer‘îsin def‘ etmek üzere her biri râzı ve kat‘-ı nizâ‘ eylediklerini mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği huzûr-ı âlîlerine i‘lâm olundu. Fî 23 S sene 1153.