Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 504 Hüküm no: 660 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zamanaşımı nedeniyle davaya bakılmadığı Ma‘rûz Zâtı ta‘rîf-i şer‘î ile mu‘arrefe olan sâhibe-i arzuhâl Ümmühan Hatun Bâb Mahkemesi’nde meclis-i şer‘a ihzâr eylediği Mustafa nâm kimesneden babam müteveffâ Mustafa Çavuş târîh-i i‘lâmdan elli dokuz sene mukaddem hacc-ı şerîfe âzim olduğu halde ceddim merhûm Sinan Ağa nâm sâhibü’l-hayrın İstanbul’da Davudpaşa kurbünde Ali Fakıh mahallesinde vâki‘ vakfı olan menzilin vakfiye ve senedât-ı şer‘iyyesini mezbûr Mustafa’nın babası müteveffâ Câbî Halil’e bırakıp tarîk-i hacc-ı şerîfde babam mezbûr Mustafa Çavuş vefât etmekle vakfiye ve senedâtı şer‘iyyeyi mezbûr Mustafa’dan taleb ederim deyü eylediği da‘vâsında zamân mürûr edip hükkâm bilâ-emr istimâ‘ından memnû‘ olmağın mezbûre Ümmühan Hatun da‘vâsına iltifât olunmayıp bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 25 S sene 1153.