Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 504 Hüküm no: 661 Orijinal metin no: [77b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı olmayanların sokakta satış yapmalarının engellenmesi Bâ-mühr-i efendi Ma‘rûz Helvacılar i‘lâmıdır Ashâb-ı arzuhâl helvacı hırfetinin bâ-fermân-ı âlî kethüdâları el-Hâc Mehmed ve hırfet-i mezkûreden Mustafa b. Mehmed ve Mehmed b. Mustafa ve Mehmed b. Ömer ve Mustafa b. Ali ve sâir cerîdede mastûrü’l-esâmî kimesneler meclis-i şer‘de derûn-ı arzuhâlde mezkûrü’l-ism es-Seyyid Mehmed b. İbrahim ve Hasan b. İbrahim ve Halil b. İbrahim ve sâirleri muvâcehelerinde hırfetimiz erbâbı işbu yedimizde olan evâmir-i aliyye ve i‘lâmlar mantûkunca helvanın envâ‘ ve ecnâsın mahallât ve [e]svâkda bey‘ etmeyip dükkânlarımızda bey‘ etmek üzere beynimizde nizâm verilmiş iken hâlâ helvacılık san‘atında kat‘â alâkası olmayan mezbûrûn es-Seyyid Mehmed ve Hasan ve Halil ve sâirleri hilâf-ı emr-i âlî mahallât ve esvâkda bey‘ edip nizâm-ı kadîmimizin ihtilâline ve ibâdullahın ızrârına bâdî ve bâ‘is olurlar deyü teşekkî ve fîmâ-ba‘d hilâf-ı emr-i âlî hareketden men‘ ü def‘ olunmak bâbında fermân-ı âlî iltimâs eyledikleri huzûr-ı âlîlerine i‘lâm olundu. Fî 23 S sene 1153.