Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 507 Hüküm no: 667 Orijinal metin no: [78a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Pirinçciler haricinde koltukçu taifesinin pirinç alıp satmasının yasak olduğu Bâ-mühr-i efendi Ma‘rûz Mahmiye-i İstanbul’da Pirinçciler kethüdâsı el-Hâc Halil b. Mehmed ve yiğitbaşı es-Seyyid Ebubekir Çelebi b. Mustafa ve sâir cerîdede mazbûtü’l-esâmî kimesneler meclis-i şer‘de el-Hâc Ali b. İbrahim ve Mustafa b. Hasan ve el-Hâc İsmail b. el-Hâc Ahmed ve Mehmed b. Ali ve Ali b. Kemâl ve Hasan b. Halil nâm kimesneler ile Anaştaş v. Yorgi ve Yorgi v. Nikola nâm zimmîler ve sâirleri muvâcehelerinde müddet-i medîdeden beri Mısr-ı Kāhire tüccârı sefâin ile getirdikleri pirinçlerin gümrük önünde bi’n-nefs kendüleri ve yâhûd vekîlleri olduğu hırfet-i mezkûrenin ma‘lûmu olan kimesneler ibâdullaha bey‘ mâ‘adâsını hırfetimiz erbâbı kethüdâmız ma‘rifetiyle ashâbından iştirâ ve narh-ı cârî üzere ibâdullaha bey‘ edip ecânibden aslâ ve kat‘â bir kimesne müdâhale etmez iken zamân-ı karîbde koltukçu tâifesi zuhûr ve Mısır bâzergânı kıyâfetine girip aldıkları pirinci ziyâde bahâ ve damgasız keyl ile gümrük önünde bey‘ ve bundan mâ‘adâ tenhâ mahallerde mahzenler tutup pirinci hufyeten ziyâde bahâ ile taşraya fürûht ve ol vechile ibâdullahı ızrâr ve nizâm-ı kadîmimizin ihtilâline bâdî ve bâ‘is olduklarına binâen bundan akdem kirâren ve mirâren kendüleri men‘-i ekîd ile men‘ olunup bir vechile mütenebbih olmamışlardır deyü teşekkî ve mazmûnu takrîr-i meşrûhlarına mutâbık evâmir-i aliyye ve hüccet ve i‘lâmlar ibrâz etmeleriyle fîmâ-ba‘d Mısr-ı Kāhire tüccârı getirdikleri pirinçlerin gümrük önünde bi’n-nefs kendüleri ve yâhûd taraflarından vekîlleri olup hırfet-i mezkûrenin ma‘lûmları olan kimesneler narh-ı cârî üzere ibâdullaha bey‘ edip koltukçu tâifesi mahall-i mezbûrda ve âhar mahallerde ber-vech-i muharrer hilâf-ı emr-i âlî pirinç bey‘ etmemek üzere fermân-ı âlî iltimâs eyledikleri huzûr-ı âlîlerine i‘lâm olundu. Fî 24 S sene 1153.