Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 508 Hüküm no: 669 Orijinal metin no: [78a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yako’nun hamile karısını dövdüğü iddiasıyla Aslan aleyhine açtığı davayı ispatlayamadığı Bâ-mühr-i efendi Ma‘rûz Havâss-ı Refî‘a kazâsı muzâfâtından Hasköy kasabasında mütemekkin Yako v. Aron nâm Yahûdi meclis-i şer‘de derûn-ı arzuhâlde ismi mastûr Aslan v. Yako nâm Yahûdi muvâcehesinde târîh-i i‘lâmdan bir sene mukaddem mahmiye-i İstanbul’da Cibali kapısı hâricinde hâzır bi’l-meclis Yasef nâm Yahûdi’nin menzilinde zevcem Ester nâm Yahûdiye’nin odun ile arkasına ve beline ve başına mesfûr Aslan bi-gayr-ı hakkın darb edip ondan nâşî zevcem mezbûre bir cenîn-i zeker hayyen ilkā ve dört sâ‘at mürûrunda helâk ve yirmi dört sâ‘at mürûrunda zevcem mezbûre dahi müteessiren hâlike olup verâseti benimle vasîsi olduğum evlâd-ı sıgārına münhasıra olmuş idi, hâlâ mûcib-i şer‘îsini asâleten ve vesâyeten taleb ederim ba‘de’d-da‘vâ ve’l-inkâr müdde‘î-i mezbûr müdde‘âsını bir vechile isbâta kādir ve tahlîfe dahi tâlib olmamağla mûcebince müdde‘î-i mesfûr Yako bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 29 S sene 1153.