Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 508 Hüküm no: 670 Orijinal metin no: [78a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamamcı Ali’nin vefatıyla varisleri arasındaki davada sulh sağlandığı Bâ-mühr-i efendi Ma‘rûz Mahmiye-i İstanbul’da Kırkçeşme kurbünde Kazgancılar mahallesinde sâkin iken bundan akdem vefât eden Hamamcı el-Hâc Ali’nin verâseti zevcesi Hadîce ve oğulları el-Hâc Hüseyin ve el-Hâc İbrahim ve kızları Fâtıma ve Habibe ve Kadriye’ye ba‘de’l-ihzâr sâhibe-i arzuhâl mezbûre Kadriye zâtı ba‘de’t-tar‘îfi’ş-şer‘î meclis-i şer‘de fahrü’l-muhadderât Râbia Hanım bt. el-merhûm Defterdâr Halil Efendi tarafından vekîl-i sâbitü’l-vekâlesi el-Hâc İbrahim Ağa mahzarında mahmiye-i mezbûrede Sekbanbaşı İbrahim Ağa mahallesinde vâki‘ ma‘lûmü’l-hudûd ve’l-müştemilât bir bâb mülk hamam babam müteveffâ-yı mezbûrun hayâtında ile’l-vefât yedinde mülkü olup ba‘de vefâtihî işbu el-Hâc Hüseyin fuzûlî zabt ve müvekkile-i mezbûreye bey‘ ve bana gadr etmekle hâlâ hamâm-ı mezbûrdan bana mevrûs olan sümün hisse-i irsiyemi müvekkile-i mezbûre bi-gayr-ı hakkın zabt eder kasr-ı yedine tenbîh olunmak matlûbumdur deyü eylediği da‘vâsından yirmi guruş bedel-i makbûza vekîl-i mezbûr ile ber-nehc-i şer‘î sulh olup âmme-i da‘vâdan müvekkile-i mezbûre Râbia Hanım’ın zimmetini ibrâ ve ıskāt edip kat‘-ı nizâ‘ eyledikleri huzûr-ı âlîlerine i‘lâm olundu. Fî 23 S sene 1153.