Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 511 Hüküm no: 675 Orijinal metin no: [78b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yıktırılan mutfağın eve verdiği zararın giderilmesi Ma‘rûz Sâdır olan fermân-ı âlîlerine imtisâlen savb-ı şer‘den irsâl olunan Mevlânâ Keşif Nâibi Hıfzı el-Hâc Mehmed Efendi hâssa mimârlarından el-Hâc Mustafa Halîfe ve Halil Halîfe ile mahmiye-i İstanbul’da Debbâğ Yunus mahallesinde vâki‘ mahall-i nizâ‘ın üzerine varıp ba‘de akdi’l-meclis ashâb-ı arzuhâl Mehmed Efendi ve Emetullah Hatun asâleten ve Hanife Hatun tarafından vekîl-i sâbitü’l-vekâlesi Süleyman vekâleten meclis-i ma‘kūd-ı mezkûrda câr-ı mülâsıkları olup derûn-ı arzuhâlde mezkûrü’l-ism es-Seyyid Hasan muvâcehesinde mezbûr es-Seyyid Hasan işbu mu‘âyene olunan mimârân-ı mezbûrân mesâhaları üzere tûlen dokuz zirâ‘ altı parmak ve kadden altı buçuk zirâ‘ mezbûr Mehmed Efendi tarafından ve yine tûlen altı buçuk zirâ‘ ve kadden altı buçuk zirâ‘ mezbûretân Emetullah ve Hanife taraflarında vâki‘ matbahını hedm eyledikde mârrü’z-zikr duvarlarımızın dibini hafr ve bizim binâmız sed olmak hasebiyle hafrından nâşî duvarlarımıza vehn târî ve üzerine vaz‘ olunan toprakları çatlayıp zarâr-ı şer‘îsi olmağla men‘ ü def‘ olunmak matlûbumuzdur deyü her birleri ba‘de’d-da‘vâ ber-vech-i muharrer zarâr olduğunu mimârân-ı mezbûrân haber verdikden sonra tavassut-ı muslihîn ile mezbûretân Emetullah ve Hanife hatunların tûlen yedi zirâ‘ ve arzen mevcûd iki zirâ‘ sed duvarı üzerine kadden dört zirâ‘ dahi yukarı başı …? üzere kârgîr taş duvar binâ ve sedd-i duvarlardan mezbûr es-Seyyid Hasan’a zarâr isâbet ederse zarâr da‘vâsından her birleri zimmetlerini ibrâ ve ıskāt eyledik deyü ikrâr ve her biri âharı tasdîk ile kat‘-ı nizâ‘ eylediklerini mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ ve takrîr etmeğin huzûr-ı âlîlerine i‘lâm olundu. Fî 26 S sene 1153.