Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 511 Hüküm no: 676 Orijinal metin no: [78b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’in ortağı Ali’ye olan borcunu ödemesi Ma‘rûz Sâhib-i arzuhâl Ali Mahkeme-i Bâb’da meclis-i şer‘de derûn-ı arzuhâlde mezkûrü’l-ism el-Hâc Ahmed mahzarında mezbûr el-Hâc Ahmed ile vücûh-ı ticâretde iki sene şerîk olup târîh-i i‘lâmdan otuz gün mukaddem nalburlar sûkunda mezbûr el-Hâc Ahmed ile fesh-i şirket edip hesâb ve kitâbımız görüldükde mezbûr el-Hâc Ahmed zimmetinde kırk altı bin üç yüz elli iki akçe hakkım zuhûr etmeğin meblağ-ı mezbûrun otuz bin akçesini yedinden ahz u kabz edip on altı bin üç yüz elli iki akçe bana zimmetinde deyni olduğunu mahzar-ı şuhûdda ikrâr-ı kat‘î ile ikrâr etmeğin meblağ-ı bâkī-yi mezbûr on altı bin üç yüz elli iki akçesi merkūm el-Hâc Ahmed’den taleb ederim deyü da‘vâ eyledikde ol dahi inkâr etmeğin müdde‘î-i mezbûr Ali ber-vech-i muharrer müdde‘âsını lede’t-tezkiye şehâdetleri makbûle olan nalbur tâifesinden İbrahim b. Osman ve diğer İbrahim b. İsmail şehâdetleriyle merkūm el-Hâc Ahmed muvâcehesinde vech-i şer‘î üzere isbât etmeğin mûcebince meblağ-ı bâkī-yi mezbûr on altı bin üç yüz elli iki akçeyi müdde‘î-i mezbûr Ali’ye edâ ve teslîme merkūm el-Hâc Ahmed’e tenbîh olunduğu huzûr-ı âlîlerine i‘lâm olundu. Fî selhi S sene 1153.