Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 514 Hüküm no: 683 Orijinal metin no: [79a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadriye’yi talâkla boşayan Kurd b. İbrahim’in mehir ve nafakayı ödemesi Ma‘rûz Kıbtî tâifesinden olup cizyedâr tarafından mübâşir el-Hâc Hasan yediyle Bâb Mahkemesi’ne ihzâr olunan Kurd b. İbrahim’in zevcesi ve hasmı Kadriye nâm Kıbtiye meclis-i şer‘de mezbûr Kurd târîh-i i‘lâmdan yirmi beş gün mukaddem sekerân olduğu halde dokuz talâk beni tatlîk etmekle zimmetinde mütekarrer bin iki yüz akçe mehrimi ve nafaka-i iddeti ve me’ûnet-i süknâmı mezbûrdan taleb ederim deyü ba‘de’d-da‘vâ ve’l-inkâr mezbûre Kadriye ber-vech-i muharrer müdde‘âsını lede’t-tezkiye makbûlü’ş-şehâde oldukları müte‘ayyen olan Arslan b. İbrahim ve Durmuş b. Hasan nâm Kıbtîler şehâdetleriyle merkūm Kurd muvâcehesinde vech-i şer‘î üzere isbât etmeğin mûcebince ba‘de’l-hükm mehr-i mezkûr bin iki yüz akçe ile nafaka-i iddet ve me’ûnet-i süknâsı’çün ta‘yîn olunan üç yüz akçe ki cem‘an bin beş yüz akçeyi müdde‘iye-i mezbûra edâ ve teslîme mezbûr Kurd’a tenbîh olunduğu huzûr-ı âlîlerine i‘lâm olundu. Fî-gurreti Rebî‘ülevvel sene 1153.