Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 518 Hüküm no: 691 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Miras kalan çıkrıkçı dükkânındaki eşyaların satıldıktan sonra alacak davasında sulh sağlandığı Ma‘rûz Mahmiye-i İstanbul’da Molla Hüsrev mahallesi ahâlîsinden iken bundan akdem vefât eden el-Hâc Mustafa’nın verâseti zevcesi Rukiye ve sulbiye kebîre kızları Hamide ve Âişe hatunlara ba‘de’l-inhisar sâhib-i arzuhâl İbrahim meclis-i şer‘de zâtı ta‘rîf-i şer‘î ile mu‘arrefe olan mezbûr Rukiye mahzarında mahmiye-i mezbûrede Uzunçarşı’da vâki‘ müteveffâ-yı mezbûrun ile’l-vefât tasarrufunda olan çıkrıkçı dükkânında mevcûde ber-mûceb-i defter eşyâ ve âlât-ı ma‘lûmeyi merkūme Rukiye’nin yedinden yüz elli guruş semen-i medfû‘a iştirâ ve tesellüm eylediğimde dükkân-ı mezbûrun mücerred gediği olmak üzere merkūme Rukiye bi-gayr-ı hakkın yedimden yüz guruşumu ahz etmiş idi, hâlâ meblağ-ı mezbûr yüz guruşumu taleb ederim deyü eylediği da‘vâsından tavassut-ı muslihîn ile altmış beş guruş üzerine ber-nehc-i şer‘î sulh olup bedel-i mezkûr altmış beş guruş mezbûre Rukiye’den tahsîl olundukdan sonra mezbûr İbrahim âmme-i da‘vâdan mezbûrât Rukiye ve Hamide ve Âişe’nin zimmetlerini ibrâ ve ıskāt eyledikde merkūme Rukiye dahi kezâlik âmme-i da‘vâdan mezbûr İbrahim’in zimmetini ibrâ ve ıskāt eylediği Bâb Mahkemesi’nde ba‘de’t-tescîl huzûr-ı âlîlerine i‘lâm olundu. Fî 4 Ra sene 1153.