Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 519 Hüküm no: 694 Orijinal metin no: [80a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çarşı pazarda sadece dikici esnafının yaptığı kaliteli çizme ve ayakkabıların satılacağı Bâ-mühr-i efendi Ma‘rûz Mahmiye-i İstanbul’da Bezzâzistân-ı âtîk kurbünde vâki‘ haffâflar arastası kethüdâsı es-Seyyid el-Hâc Mehmed ve doğancılar arastası kethüdâsı el-Hâc Musa ve Tahtelkale arastası kethüdâsı el-Hâc Mehmed ve Zindankapısı arastası kethüdâsı el-Hâc Hüseyin ve Avratpazarı arastası kethüdâsı el-Hâc Mehmed ve Balatkapısı arastası kethüdâsı el-Hâc Ahmed ve Şehzâde Câmi‘i civârında vâki‘ arasta kethüdâsı Abdullah ve Karaman-ı kebîr arastası kethüdâsı el-Hâc Hüseyin ve Çizmecibaşı el-Hâc Halil ve zikr olunan arastalar ihtiyârlarından el-Hâc Ali ve el-Hâc Mustafa ve Ömer ve sâir cerîdede mazbûtü’l-esâmî cemm-i gafîr ve cem‘-i kesîr kimesneler meclis-i şer‘de dikici tâifesinden Agob ve Ara ve Kirkor ve Avadik ve Horos ve Tomas ve Asvador ve Bağdasar ve Serkiz ve diğer Serkiz ve Sekbas diğer Tomas nâm zimmîler ve sâirleri muvâcehelerinde işbu yedimizde olan hatt-ı hümâyûn-ı şevket-makrûn ile mu‘anven üç kıt‘a evâmir-i aliyye ve hücec-i şer‘iyye ve i‘lâmlar mantûkunca kadîmü’l-eyyâmdan berü dikici tâifesi dükkânlarda ve menzillerinde ve odalarda dikdikleri mest ve papuc ve çizme ve sâir bey‘ ü şirâsı bize mahsûs olan bi’l-cümle emti‘aların zikri sebk eden arastalara getirip müte‘ayyen dellâlleriyle ba‘de’l-müzâyede ve inkıtâ‘i’r-rağbet tâife-i mezbûreden her kimin üzerinde karâr eder ise ona bey‘ edegelmişler iken hâlâ mesfûrûn ve sâirleri mârrü’z-zikr arastalarda bey‘ ü şirâsı memnû‘ olan redî ve alçak mest ve papuç ve çizmeyi kendüleri dikip ve sâir hâm-dest olan dikicilerden iştirâ eyledikleri ayakkabıların çarşı ve pazarlarında ve sâir mahallerde a‘lâ olmak üzere diledikleri bahâya fürûht ve ibâdullahı ol vechile ızrâr edip nizâm-ı kadîmimize dahi halel verirler deyü teşekkî ve mazmûnu min-külli’l-vücûh takrîr-i meşrûhlarına mutâbık hatt-ı hümâyûn-ı şevket-makrûn ile mu‘anven ve muhallâ üç kıt‘a evâmir-i aliyye ve hücec ve i‘lâmlar ibrâz ve bi’l-muvâcehe feth ü kırâet ve mefhûmların kendülere ifhâm ve tefhîm ile ilzâm ve iskāt olunmalarıyla fîmâ-ba‘d mesfûrdan zikr olunan senedâtlarına muhâlif vaz‘ u hareket etmemek üzere fermân-ı âlî iltimâs eyledikleri huzûr-ı âlîlerine i‘lâm olundu. Fî 27 S sene 1153.