Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 521 Hüküm no: 696 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süleyman’ın nalband esnafına mahsûs işleri yapmayacağına dair taahhütte bulunduğu Bâ-mühr-i efendi Ma‘rûz Mahmiye-i İstanbul’da nalbandlar kethüdâsı el-Hâc Mustafa du‘âcıları es-Seyyid Halil ve yiğitbaşıları İbrahim ve ihtiyârlarından el-Hâc Hasan ve İbrahim ve Süleyman ve sâir cerîdede mazbûtü’l-esâmî kimesneler meclis-i şer‘de nalbur tâifesinden Süleyman b. Mustafa nâm kimesne mahzarında kadîmü’l-eyyâmdan beri taşradan fürûht için gelen na‘l ve mıh mahmiye-i mezbûrede Karaman-ı sagīrde vâki‘ hâna vaz‘ ve hırfetimiz erbâbı kethüdâ ve yiğitbaşı ve ihtiyârlar ma‘rifetleriyle değer bahâsıyla ashâbından iştirâ ve kadîmden olageldiği vech üzere tevzî‘ ve taksîm ve narh-ı cârî üzere ibâdullahın devâb ve mevâşîlerin nallayıp bu vechile nizâm-ı ahvâlimiz var iken mezbûr Süleyman hırfetimizden olmayıp mücerred ihtikâr için taşradan gelen bize mahsûs na‘l ve mıhı ziyâde bahâ ile iştirâ ve Rüstem Paşa Câmi‘-i şerîfi kurbünde hilâf-ı mu‘tâd dükkânına vaz‘ ve ziyâde bahâ ile hırfetimize bey‘ etmekle narh-ı cârî ve bizim ahvâlimiz her vechile muhtel ve müşevveş olmuşdur deyü teşekkî eylediklerinde mezbûr Süleyman dahi hâl bahs olunan minvâl üzere olduğunu ikrâr ve i‘tirâf ve min-ba‘d mezbûrûna mahsûs olan na‘l ve mıhı taşradan getirdikde doğru zikr olunan Karaman-ı sagīrde vâki‘ hâna vaz‘ ve nalbandlara vech-i meşrûh üzere bey‘ edip nizâm-ı kadîme muhâlefet hareket etmemek üzere ta‘ahhüd ve bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî-gurreti Rebî‘ülevvel sene 1153.