Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 521 Hüküm no: 697 Orijinal metin no: [80b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçü Yorgi’nin fuzuli zabt iddiasının reddi Bâ-mühr-i efendi Ma‘rûz Derûn-ı arzuhâlde ismi mastûr olup zâtı ta‘rîf-i şer‘î ile mu‘arrefe olan Bozo bt. Hıristo nâm Nasrâniye meclis-i şer‘de sâhib-i arzuhâl Kürkçü Yorgi v. Mihal nâm zimmî mahzarında Ayasofya-i kebîr Vakfı’ndan olup mahmiye-i İstanbul’da Mahmud Paşa Hanı’nda vâki‘ tasarrufumda olan bir bâb odayı mesfûr Yorgi fuzûlî zabt etmekle kasr-ı yedine tenbîh olunmak matlûbumdur deyü da‘vâ, mesfûr Yorgi dahi cevâbında bin yüz elli iki senesi Ramazani’l-mübâreki gurresinden on sekiz ay tamâmına dek akd ve ahz ile zikr olunan odayı işbu müdde‘iye-i mesfûre bana ber-vech-i şer‘î îcâr ve teslîm ben dahi istîcâr ve tesellüm ve kabûl eyledim deyü def‘ ve müdde‘iye-i mezbûre ba‘de’l-inkâr mezbûr Yorgi def‘-i mezkûrunu lede’t-tezkiye makbûlü’ş-şehâde oldukları zâhir olan Kürkçü Dimitri v. Nano ve Nikola v. Yandazi ve Koçu v. Yanaki nâm zimmîler şehâdetleriyle bi’l-muvâcehe şer‘an isbât etmeğin mûcebince müdde‘iye-i mesfûre bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 4 Ra sene 1153.