Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 522 Hüküm no: 698 Orijinal metin no: [80b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil’in Devrek’in Bağran köyündeki Ali Fakıh Zaviyedarı Osman Çavuş’a müdahale etmemesi Bâ-mühr-i efendi Ma‘rûz Sâhib-i arzuhâl Osman Çavuş meclis-i şer‘de derûn-ı arzuhâlde mastûrü’l-ism Demirci Halil nâm kimesne mahzarında vilâyet-i Anadolu’da Kastamonu sancağında Devrek kazâsına tâbi‘ Bağran nâm karyede vâki‘ Ali Fakıh zâviyesinin zâviyedârlığına bâ-berât-ı âlîşân cedd-i a‘lâm Şeyh Hüseyin Bekir yedi sene mutasarrıf ve ba‘de vefâtihî merhûmun oğlu babam Şeyh Osman dahi bâ-berât-ı sultânî ile yirmi bir sene mutasarrıf olup bin yüz kırk senesinde fevt oldukda zikr olunan zâviyedârlık babam mahlûlünden bâ-berât-ı âlîşân bana tevcîh olunmağla hâlâ tasarrufumda olup âhardan aslâ dahl olunmak îcâb etmez iken bundan akdem mezbûr Halil zâviye-i mezkûra kendi meşrûtası olmak üzere tasaddî eylediği da‘vâsından işbu bir kıt‘a i‘lâm mantûkunca fâriğ olmuş idi, hâlâ yine bi-gayr-ı hakkın münâza‘a ve müdâhale etmekle men‘ ü def‘ olunmak matlûbumdur dedikde gıbbe’l-istintâk mezbûr Halil dahi cevâbında hâl bast olunan minvâl üzere olup mezbûr Osman Çavuş’un takrîr-i meşrûhu vâkı‘a mutâbık ve nefsü’l-emre muvâfık olduğunu bi’t-tav‘i’s-sâf ikrâr ve i‘tirâf etmeğin mezbûr Halil bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 23 S sene 1153.