Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 524 Hüküm no: 702 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ekmekçi Ali’ye kefil olan Mehmed’in borcu ödemesi Ma‘rûz Sâhib-i arzuhâl mütevellî Eyüb Odabaşı Mahkeme-i Bâb’da meclis-i şer‘de, arzuhâlde mezkûrü’l-ism Mehmed mahzarında, arzuhâlde zikr olunan Ekmekçi Ali b. Mehmed hayâtında mütevellîsi olduğum nukūd-ı mevkūfeden işbu mu‘anven ve mersûm temessük mantûkunca iki yüz guruş istidâne ve kabz eyledikde meblağ-ı mezbûra bi’l-emr ve’l-kabûl mezbûr Mehmed kefîl olmağın binâen-aleyh meblağ-ı mezbûru merkūm Mehmed’den bi’t-tevliye taleb ederim deyü ba‘de’d-da‘vâ ve’l-inkâr mezbûr Eyüb Odabaşı müdde‘âsını udûlden İbrahim Çelebi b. Mehmed ve Hasan Odabaşı b. Abdullah ve el-Hâc Ali b. Mustafa ve Osman Odabaşı b. Ömer şehâdetleriyle ber-vech-i şer‘î isbât etmeğin mûcebince meblağ-ı mezbûr iki yüz guruşu bi-hükmi’l-kefâle mütevellî-yi mezbûr Eyüb Odabaşı’ya edâ ve teslîme mezbûr Mehmed’e tenbîh olunduğu huzûr-ı âlîlerine i‘lâm olundu. Fî 7 Ra sene 1153.