Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 524 Hüküm no: 703 Orijinal metin no: [81a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Huri’nin vefat eden Ahmed Efendi’den aldığı parayı varislerine ödemesi Ma‘rûz Müteveffâ Nüzûl Kâtibi Ahmed Efendi b. Mustafa’nın veresesinden karındaşı Abdullah asâleten ve kız karındaşı Ümmügülsüm’ün zevci ve vekîl-i şer‘îsi Musa Efendi vekâleten Mahkeme-i Bâb’da meclis-i şer‘de Huri nâm Nasrâniye muvâcehesinde mezbûre Huri mûrisimiz müteveffâ-yı mezbûr Ahmed Efendi’den hayâtında yüz guruş istidâne ve kabz ve mukābelesinde Ali Paşa-i atîk mahallesinde merhûm Süleyman Subaşı Vakfı’ndan bi’l-icâreteyn mutasarrıfa olduğu ma‘lûmü’l-hudûd menzilini mezbûr Ahmed Efendi’ye bâ-ma‘rifet-i mütevellî vefâen fâriğ olmuş idi, hâlâ menzil-i mezbûru red ile meblağ-ı mezbûru bi’l-verâse taleb ederiz deyü da‘vâ ol dahi kırk guruş ahz ve mukābelesinde vefâen ferâğını ikrâr ve mâ‘adâ altmış guruşunu ba‘de’l-inkâr müdde‘iyân-ı mezbûrân ziyâde müdde‘âlarını beyândan acz ile bi’t-taleb mezbûre Huri’ye vech-i şer‘î üzere yemîn verilip müdde‘iyân-ı mezbûrân bilâ-beyyine ziyâde mutâlebesinden ba‘de’l-men‘ kabzını mu‘terif olduğu meblağ-ı mezbûr kırk guruşu bi’t-terâzi târîh-i i‘lâmdan on güne değin müdde‘iyân-ı mezbûrâna edâ etmek üzere mezbûre Huri’ye tenbîh olundukda ber-vech-i muharrer edâya ta‘ahhüd eylediği huzûr-ı âlîlerine i‘lâm olundu. Fî 7 Ra sene 1153.