Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 525 Hüküm no: 704 Orijinal metin no: [81a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Duhancı Mehmed’e borcu olan Mehmed Ağa’nın parayı varislerine ödemesi Bâ-mühr-i efendi Ma‘rûz-ı dâ‘î Mahmiye-i İstanbul’da Karabaş mahallesinde sâkin iken bundan [akdem] vefât eden Boşnakoğlu demekle arîf Duhancı Mehmed b. Hüseyin b. Abdullah’ın verâseti zevcesi Zahide ve sulbî sagīr oğlu Mustafa ve sulbiye kebîre kızları Rukiye ve Hadîce’ye ba‘de’l-inhisar sagīr-i mezbûrun vâlidesi ve vasiye-i mansûbesi olup zâtı ta‘rîf-i şer‘î ile mu‘arrefe olan mezbûre Zahide asâleten ve vesâyeten ve mezbûre Rukiye kendi tarafından asâleten ve li-ebeveyn kız karındaşı mezbûre Hadîce tarafından husûs-ı âti’l-beyânda vekîli olduğu zâtlarını ârifân Halil ve Osman nâm şâhidân-ı âdilân ile şer‘an sâbit olmağla vekâleten meclis-i şer‘de derûn-ı arzuhâlde mezbûrü’l-ism el-Hâc Mehmed Ağa b. Abdullah nâm kimesne mahzarında mûrisimiz müteveffâ-yı mezbûrun merkūm el-Hâc Mehmed Ağa zimmetinde duhân semeninden yüz otuz dört buçuk guruş hakkı olup kable’l-ahz vefât ve meblağ-ı mezbûr bi’l-ırsi’ş-şer‘î bize ba‘de’l-intikāl meblağ-ı mezbûrun yirmi dört guruşunu mezbûr el-Hâc Mehmed Ağa’dan ahz u kabz etmiş idik, hâlâ bâkī kalan yüz on buçuk guruşu merkūm el-Hâc Mehmed Ağa’dan asâleten ve vesâyeten ve vekâleten taleb ederiz deyü da‘vâ ol dahi ikrâr ve i‘tirâf etmeğin mûcebince meblağ-ı bâkī-yi mezbûr yüz on buçuk guruşun edâsına mezbûr el-Hâc Mehmed Ağa’ya tenbîh olunduğu huzûr-ı âlîlerine i‘lâm olundu. Fî 6 Ra sene 1153.