Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 527 Hüküm no: 710 Orijinal metin no: [81b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölmüş olan Sakızlı Anton’un ortağında kalan paranın tamamen ödenmiş olduğu Bâ-mühr-i efendi Ma‘rûz Derûn-ı arzuhâlde mastûrü’l-ism Sakızlı Anton nâm hâlikin babası ve hasren vârisi olan Nasancı v. Yani nâm zimmî meclis-i şer‘de yine arzuhâlde ismi mezkûr diğer Anton v. Cani nâm zimmî mahzarında mûrisim hâlik-i mesfûrun hayâtında diğer Anton zimmetinde cihet-i ücretden iki bin guruş ve mâl-ı şirketden sekiz bin guruş ki cem‘an on bin guruş hakkını kable’l-ahz hâlik ve meblağ-ı mecmû‘-ı mezbûr bana mevrûs olmağla bi’l-verâse taleb ederim deyü da‘vâ ol dahi cevâbında hâlik-i mesfûr cihet-i ücretden zimmetimde hakkı olan bin guruş ve re’s-i mâl-ı şirketden hissesi olan bin guruş ki cem‘an iki bin guruşu hayâtında yedimden bi’t-tamâm ahz edip lâkin fâide-i hâsıladan ber-mûceb-i defter-i müfredât zimem-i nâsdan makbûzum olan meblağ-ı ma‘lûmü’l-mikdârdan hâlik-i mesfûrun hissesine isâbet eden yüz elli guruşu kable’l-ahz hâlik ve meblağ-ı mezbûr yüz elli guruşu babası mesfûrdan bi’l-ırsi’ş-şer‘î mevrûs olmağla işbu bin yüz elli üç senesi Muharremi’l-harâmının ikinci günü zikr olunan yüz elli guruşu dahi mesfûr Nasancı’ya bi’t-tamâm def‘ ü teslîm eylediğimde ol dahi işbu hüccet-i şer‘iyye mantûkunca yedimden ahz u tesellüm edip zikr olunan meblağlara ve sâir bi’l-cümle tereke-i hâlik-i mesfûra müte‘allıka âmme-i da‘vâdan benim zimmetimi ibrâ ve ıskāt edip yedime bir kıt‘a hüccet-i şer‘iyye verilmiş idi deyü takrîrine mutâbıka bir kıt‘a hüccet-i şer‘iyye ibrâzıyla ba‘de’d-def‘ ve’l-inkâr merkūm diğer Anton def‘-i mezkûrunu lede’t-tezkiye makbûlü’ş-şehâde oldukları mütehakkık olan Corci v. Nikola ve Marki v. Manol ve Todori v. Manol ve Kasim v. Mosi ve Yorgi v. Pandeli nâm zimmîler şehâdetleriyle bi’l-muvâcehe vech-i şer‘î üzere isbât eylediğinden mâ‘adâ mesfûr Nasancı def‘-i mezkûru ve mazmûn-ı hüccet-i mezkûreyi bi-tav‘ihî ikrâr ve i‘tirâf dahi etmeğin mûcebince müdde‘î-i mezfûr Nasancı bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 5 Ra sene 1153.