Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 529 Hüküm no: 712 Orijinal metin no: [81b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey Vakfı’na ait evde kiracı olan Emine’nin kirayı sadece mütevelli olan İsmail Efendi’ye ödemesi Bâ-mühr-i efendi Ma‘rûz Mahmiye-i İstanbul’da Topkapısı kurbünde Bayezid Ağa mahallesi ahâlîsinden olup ashâb-ı hayrâtdan merhûm İbrahim Bey Vakfı’na meşrûtiyet üzere mütevellî olan İsmail Efendi b. Yusuf meclis-i şer‘de vakf-ı mezbûrdan olup mahalle-i mezbûrede vâki‘ ma‘lûmü’l-hudûd ve’l-müştemilât bir bâb menzilin hâlâ icâre-i mu‘accele ve ayda kırk akçe müeccele ile mutasarrıfesi olan zâtı ta‘rîf-i şer‘i ile mu‘arrefe olan Emine bt. Mustafa nâm hatun mahzarında ben hâlâ vakf-ı mezbûr mütevellîsi olduğum hasebiyle icârât-ı mezkûre benim yedimle ahz u kabz olunup ber-mantûk-ı vakfiye zikr olunan Bayezid Ağa Câmi‘i’nde müezzinler olan işbu hâzır bi’l-meclis İbrahim karındaşı gāib ani’l-meclis Mehmed’e verilmek iktizâ ederken mezbûre Emine icâre-i mezkûreyi bana vermeyip iznimsiz müezzinân-ı mezbûrâna vermek murâd eder deyü mazmûnu takrîr-i meşrûhuna mutâbık bir kıt‘a vakfiye-i ma‘mûlün-bihâ ibrâz eyledikde merkūmân Emine ve İbrahim ile gāib-i merkūmun karındaşı ve vekîli Halil’den her biri dahi husûs-ı mezbûru ve mazmûn-ı vakfiye-i merkūmeyi ba‘de’l-ikrâr mezbûre Emine dahi min-ba‘d icâre-i merkūmeyi mütevellî-yi mezbûr İsmail Efendi’ye vermeye ta‘ahhüd edip bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî-gurreti Rebî‘ülevvel sene 1153.