Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 529 Hüküm no: 713 Orijinal metin no: [82a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm’ün mallarına müdahale edilmemesine dair elinde emr-i âlî olduğuna dair terkin edilmiş kayıt < Sofular mahallesi sâkinelerinden Emine bt. Hüseyin b. Abdullah nâm hatunun zevci ve tarafından vekîl-i sâbitü’l-vekâlesi Molla Mustafa b. Hüseyin nâm kimesne meclis-i şer‘de Ümmügülsüm bt. el-Hâc Mustafa nâm hatun muvâcehesinde mezbûre Ümmügülsüm kendi mâlından teberru‘an zevcesi müvekkile-i merkūme Emine’ye cihâz olmak üzere nakid yetmiş bir guruş ile beş yüz guruş kıymetli on altı miskāl bir çift altın bilezik ve beşer ayaklı bir çift altın zümrüd küpe ve iki incili kuşak ve iki sîm kuşak ve eşyâ-i ma‘lûme ve elli beş vakıyye evân-ı nühâsiye verdiğini bi’l-vekâle ikrâr ve i‘tirâf ettikden sonra mezbûre Ümmügülsüm’ün zevci Bezzâzistânî el-Hâc Süleyman b. Mehmed b. Abdullah hayâtında sülüs-i mâlından müvekkilem merkūme Emine’ye yüz guruşa bir menzil iştirâ ve kırk bir zer-i mahbûb altını verile deyü vasiyet ve tenfîzine zevcesi mezbûreyi vasiyy-i muhtâr nasb edip musırran alâ-îsâihî mezbûr el-Hâc Süleyman vefât etmekle müteveffâ-yı mezbûrun sülüs-i mâlından menzil semeni yüz guruş ile kırk bir zer-i mahbûb altınını vasiye-i mezbûre Ümmügülsüm’den bi’l-vekâle taleb ederim deyü vasiye-i mezbûre Ümmügülsüm ile ba‘de’l-mürâfa‘a vasiye-i mezbûrenin hâlâ yedinde olup ibrâz eylediği bin yüz elli iki senesi şehr-i Ramazan-ı şerîfinin on beşinci günü târîhiyle müverrah sâdır olan fermân-ı âlî müteveffâ-yı mezbûrun emvâl ve eşyâsı cânib-i mîrîden ahz u kabz olunup ancak zevce-i mezbûrenin beş yüz guruş mehr-i müsbeti için avâtıf-ı aliyye-i cihân-dârîden inâyet ve ihsân olunan eşyâ ve nukūda müteveffâ-yı mezbûrun veresesi taraflarından ve taraf-ı âhardan vechen mine’l-vücûh bir dürlü ta‘arruz ve müdâhale ve rencîde olunmamak bâbında ber-mûceb-i telhîs vârid olan emr-i âlî derûnunda mezbûre Ümmügülsüm Hatun’a fîmâ-ba‘d verese tarafından ve taraf-ı âhardan vechen mine’l-vücûh bir dürlü ta‘arruz ve müdâhale ve rencîde ettirilmeye deyü mastûr olmağla imtisâlen li’l-emri’l-âlî vekîl-i mezbûrun da‘vâsı mesmû‘a olmadığı vekîl-i mezbûr Molla Mustafa’ya ba‘de’t-tefhîm ve’l-men‘ vekîl-i mezbûr Molla Mustafa husûs-ı mezkûra ve sâir hukūka müte‘allıka âmme-i da‘vâdan mezbûre Ümmügülsüm’ün bi’l-vekâle zimmetini ibrâ ve ıskāt ettikde ol dahi müvekkile-i merkūmeye cihâz olmak üzere medfû‘u olan nukūd [ve] eşyâ-i muharrere-i mezkûre ve sâir hukūka müte‘allıka âmme-i da‘vâdan müvekkile-i merkūme Emine’nin zimmetini ibrâ ve ıskāt edip kat‘-ı nizâ‘ eyledikleri Mahkeme-i Bâb’da tescîl ve huzûr-ı âlîlerine i‘lâm olundu. Fî 8 Rebî‘ülevvel sene 1153.>>