Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 534 Hüküm no: 720 Orijinal metin no: [82b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in nişastacılar esnafının nizamına uygun davranacağı Bâ-mühr-i efendi Ma‘rûz Mahmiye-i İstanbul’da Rüstem Paşa Câmi‘-i şerîfi kurbünde nişastacılar hırfetinin kethüdâları Kasım Odabaşı b. Osman ve yiğitbaşıları el-Hâc İbrahim b. Rüstem ve ihtiyârlarından Mustafa b. Ali ve el-Hâc Hamidullah b. Ali ve Mehmed b. Ebubekir ve sâir cerîdede mazbûtü’l-esâmî kimesneler meclis-i şer‘de hırfet-i mezkûreden el-Hâc Mustafa b. Mehmed nâm kimesne mahzarında kadîmü’l-eyyâmdan ilâ-hâze’l-ân hırfetimiz erbâbı nişastacılar metâ‘ı olan yaş buğdayı ashâbından kethüdâmız ma‘rifetiyle iştirâ ve ale’l-iştirâki’s-seviyy iktisâm edip bu vechile beynimizde nizâm verilmiş iken mezbûr el-Hâc Mustafa dâimâ hilâf-ı mu‘tâd-ı kadîm hareket etmekle nizâmımızın ihtilâline bâ‘is ü bâdî olur deyü teşekkî ol dahi min-ba‘d hilâf-ı mu‘tâd-ı kadîm hareket ve mezbûrûnu rencîde vü remîde etmemek üzere ta‘ahhüd eylediği huzûr-ı âlîlerine i‘lâm olundu. Fî 2 Ra sene 1153.