Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 350 Hüküm no: 511 Orijinal metin no: [76a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Todori’yi yaralayıp mallarını gasbeden Nedelko ve Yovanco’nun bulunarak hakim karşısına çıkarıldığı Üsküdar kazâsına tâbi‘ Kuzguncuk nâm karye ahâlîsinden Yorgi v. Todori nâm zimmî mahfil-i kazâda yine Üsküdar kazâsında Çengel nâm karyeden işbu bâ‘isü’l-kitâb Palaş v. Aleksandre ve Nikola v. Yorgi ve Oyoro v. Aleksandre nâm zimmîler muvâcehelerinde ikrâr ve takrîr-i kelâm edip târîh-i kitâbdan sekiz ay mukaddem gece ile evimi basıp emvâl ve erzâkımı nehb ü gāret edip beni mecrûh eylemişler idi, bu husûsda gāibân ani’l-meclis Ağrıcı? Nedelko ve Yovanco nâm zimmîleri mazınne ittihâz eylediğimde mezbûrûn zimmîler merkūmân Nedelko ve Yovanco’yu bulup bana teslîm etmeye müte‘ahhidler olmuşlar idi. Hâlâ ahidleri mûcebince merkūmânı bulup şer‘le da‘vâyı görmek için bana teslîm ettiler, mezbûrûn Palaş ve Nikola ve Oyoro ile vechen mine’l-vücûh husûs-ı mezbûra müte‘allik da‘vâ ve nizâ‘ım yokdur, eğer evim basılmasına ve emvâl ve erzâkımın nehb ü gāret olmasına ve benim cerâhatime müte‘allik mezbûrûn zimmîlerin üzerlerine benden bi’l-asâle ve bi’l-vekâle da‘vâ sudûr ederse lede’l-hükkâmi’l-kirâm istimâ‘ olunmaya dedikde mukırr-ı mezbûru ikrâr-ı meşrûhunda herbiri vicâhen tasdîk etmeğin mâ-hüve’l-vâki‘ bi’t-taleb ketb olundu. Hurrire fi’l-yevmi’l-hâmis aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Hasan Beşe b. Abdullah, el-Hâc Muharrem Bey b. Abdülkerim, Bekir Beşe b. Mahmud Efendi, Terekecibaşı İsmail Bey, el-Hâc Mehmed Bey b. İbrahim, Mehmed Efendi [b.] Halil, Ahmed Çelebi [b.] Şa‘ban, Ali Beşe b. Sefer, Vargo v. Panayot, Panayot v. Yovan, Laskari v. Manol müsellem, İlya v. Yorgi müsellem.