Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 350 Hüküm no: 512 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kenan b. Abdullah tedbir ile âzat edilmiş olduğundan sahibinin vefâtından sonra hürriyetine kavuştuğu İşbu râfi‘u’l-kitâb açık kaşlı, gök elâ gözlü, orta boylu, Rusiyyü’l-asl Kenan b. Abdullah nâm şâbb-ı emred mahfil-i kazâda mahmiye-i İstanbul’da Hoca Hayreddin Mahallesi’nde sâkin iken bundan akdem vefât eden Maksud b. Murad müteveffânın eytâm-ı sıgārına kıbel-i şer‘den mansûb vasî olan li-ebeveyn ammileri Mehmed Beşe b. Murad mahzarında üzerine da‘vâ ve takrîr-i kelâm edip ben müteveffâ-i mezbûrun abd-i memlûkü olmağile müteveffâ-i mezbûr beni târîh-i kitâbdan bir buçuk sene mukaddem hâl-i sıhhatinde benim vefâtımdan kırk gün mukaddem hür ol deyü beni tedbîr-i mukayyed ile tedbîr edip müddet-i mezbûre münkaziye olup ba‘dehû fevt olmağla ben mezbûrun cemî‘ mâlından hür olmuş iken hâlâ vasiyy-i mezbûr beni yine müteveffâ-i mezbûrun muhallefâtından olmak üzere vaz‘-ı yed eder suâl olunup üzerimden yed-i âdiye kasr ve izâle olunmak matlûbumdur dedikde gıbbe’s-suâl ve akībe’l-inkâr mevsûf-ı mezbûra müdde‘âsını mütebeyyine beyyine taleb olundukda udûlden el-Hâc Satılmış b. İbrahim ve Salih Beşe b. Mehmed nâm kimesneler meclis-i şer‘a li-ecli’ş-şehâde hâzırân olup isre’l-istişhâd fi’l-hakīka müteveffâ-i mezbûr Maksud abd-i memlûkü mevsûf-ı mezbûr Kenan’ı târîh-i mezbûrda vech-i muharrer üzere tedbîr-i sahîh-i mukayyed ile bizim huzûrumuzda tedbîr elyedi, müddet-i mezbûre münkaziye olup ba‘dehû fevt olmak ile mevsûf-ı mezbûr müteveffâ-i mezbûrun cemî‘ mâlından hür olmuşdur, biz bu husûsa ve bu vech üzere şâhidleriz, şehâdet dahi ederiz deyü herbiri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mevsûf-ı mezbûr Kenan’ın cümle mâlından hürriyetine hükm-birle mâ-vaka‘a bi’t-taleb ketb olundu. Fi’s-sâdis aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Hüseyin Beşe b. Lütfullah, Mehmed Beşe b. Hüseyin, Ali Beşe b. Habib, Süleyman Kethüdâ b. Yusuf, Nasuh Beşe b. Zülfikār, Mustafa Beşe b. Abdullah, Hasan Beşe b. Ömer, Fazlı Beşe b. ( ) çukadâr, İbrahim Çelebi b. Davud, Rıdvan b. Abdullah, el-Hâc Şa‘ban b. Ahmed ve gayruhum.