Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 537 Hüküm no: 728 Orijinal metin no: [83b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvan Niko’nun Sinan Ağa Vakfı’ndan olan bostanın bir sehm hissesine mutasarrıf olup buna Nikola’nın müdahalede bulunmaması Bahçıvân tâifesinden Niko v. Kosta nâm zimmî Bâb Mahkemesi’nde meclis-i şer‘de Nikola v. Kostandi zimmî muvâcehesinde zikri âtî vakfın mütevellîsi el-Hâc İbrahim Efendi hâzır olduğu halde merhûm mimâr Sinan Ağa Vakfı’ndan olup Yenibahçe’de Mimâr Sinan Câmi‘-i şerîfi kurbünde vâki‘ Mimâr Sinan Bostanı demekle ma‘rûf bostanın on iki sehm i‘tibâriyle bir sehmine babamın babası Yorgo zimmî mutasarrıf olup ba‘dehû bin otuz dokuz senesinde işbu yedimde olan mütevellî temessükü mantûkunca babam mezbûr Kosta’ya ferâğ ve kasr-ı yed edip babam merkūm dahi ile’l-helâk yirmi beş sene mutasarrıf olup ba‘de helâkihî intikāl-i âdî ile bana intikāl ve yirmi seneden berü ben mutasarrıf ve beher sene icâresini cânib-i vakfa edâ ederken mezbûr Nikola zimmî bi-gayr-ı vech-i şer‘î bir sehm hisseme müdâhale eder suâl olunup kasr-ı yedine tenbîh olunmak murâdımdır deyü da‘vâ eyledikde mezbûr Nikola zimmî dahi cevâbında fi’l-vâki‘ zikr olunan bir sehm hisseyi mahlûl olmak zu‘muyla mütevellî-yi vakıf temessükü ile zabt ve tasarrufunu ikrâr lâkin müdde‘î-i merkūma ber-vech-i muharrer babası hâlik-i merkūm Kosta zimmîden intikāl-i âdî ile intikāl eylediğini inkâr eyledikde müdde‘î-i mezbûr Niko zimmî vech-i meşrûh üzere da‘vâsını yine bahçıvan tâifesinden Hıristo v. Yani ve Niko v. Pano nâm zimmîler şehâdetleriyle hasmı mezbûr Nikola muvâcehesinde vech-i şer‘î üzere isbât etmeğin mûcebince zikr olunan bir sehm hisseye bi-gayr-ı vech-i şer‘î mu‘âraza etmemek üzere mesfûr Nikola zimmîye tenbîh olunduğu huzûr-ı âlîlerine i‘lâm olundu. Fî 15 R sene 1153.