Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 351 Hüküm no: 513 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf b. Abdullah tedbir ile âzat edilmiş olduğundan sahibinin vefâtından sonra hürriyetine kavuştuğu İşbu râfi‘u’l-kitâb açık kaşlı, gök elâ gözlü, orta boylu, sarışın Rusiyyü’l-asl Yusuf b. Abdullah nâm şâbb-ı emred meclis-i şer‘de mahmiye-i İstanbul’da Hoca Hayreddin Mahallesi’nde sâkin iken bundan akdem vefât eden Maksud b. Murad nâm müteveffânın bi’l-inhisâr vârisleri olan zevce-i metrûkesi Rahime bt. Mustafa nâm hâmil tarafından vekîl ve sulbiye sagīre kızları Âişe ve Cennet’in tesviye-i umûrlarına kıbel-i şer‘den mansûb vasî olan li-ebeveyn ammileri Mehmed Beşe b. Murad mahzarında üzerine da‘vâ ve takrîr-i kelâm edip ben müteveffâ-yı mezbûrun abd-i memlûkü olmağla müteveffâ-i mezbûr bana târîh-i kitâbdan bir buçuk sene mukaddem hâl-i sıhhatinde benim vefâtımdan kırk gün mukaddem hür ol deyü beni tedbîr-i mukayyed ile tedbîr edip müddet-i mezbûre münkaziye olup ba‘dehû fevt olmağla ben mezbûrun cemî‘ mâlından hür olmuş iken hâlâ vasiyy-i mezbûr ve müvekkile-i mezbûre Rahime bana yine müteveffâ-i merkūmun muhallefâtından olmak zu‘mu ile vaz‘-i yed ederler, suâl olunup üzerimden yed-i âdiyeleri kasr ve izâle olunmak matlûbumdur dedikde gıbbe’s-suâl ve akībe’l-inkâr mevsûf-ı mezbûrdan müdde‘âsını mütebeyyine beyyine taleb olundukda udûlden el-Hâc Satılmış b. İbrahim ve Salih Beşe b. Mehmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka müteveffâ-i mezbûr Maksud abd-i memlûkü mevsûf-ı mezbûr Yusuf’u târîh-i mezbûrda vech-i muharrer üzere tedbîr-i mukayyed ile bizim huzûrumuzda tedbîr eyledi, müddet-i mezbûre münkaziye olup ba‘dehû fevt olmağile mevsûf-ı mezbûr müteveffâ-i mezbûrun cemî‘ mâlından hür olmuşdur, biz bu husûsa şâhidleriz şehâdet dahi ederiz deyü herbiri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince hürriyetine hüküm-birle mâ-vaka‘a bi’t-taleb ketb olundu. Fi’l-yevmi’s-sâdis aşer min-Zilhicceti’ş-şerîfe li-sene erba‘a ve sittin ve elf. Şuhûdü’s-sâbıkūn.