Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 540 Hüküm no: 734 Orijinal metin no: [84a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fakir olduğu gerekçesiyle borcunu ödemeyen Kemel’in varlıklı olup borcunu ödemesi gerektiği Bâ-mühr-i efendi Ma‘rûz Sâhib-i arzuhâl Kemel nâm Yahûdi dâyinlerinden Yusuf b. Abdullah nâm kimesne ile sarrâf tâifesinden Artin v. Marat ve Mıgırdıç v. Ellez nâm zimmîler Dîvân-ı hazret-i sadrazamîde ma‘kūd-ı meclis-i şer‘-i hatîrde mesfûr Kemel muvâcehesinde işbu yedimizde olan üç kıt‘a i‘lâmlar mantûkunca mesfûr Kemel zimmetinde müsbet ve mahkûmun-bih beş bin dört yüz altmış dört guruş hakkımız olup hâlâ mesfûr Kemel’den taleb eylediğimde edâda mümâna‘at ile ibtâl-i hak murâd eder deyü da‘vâ ol dahi cevâbında deyn-i mezkûru ikrâr lâkin târîh-i kitâbdan üç sene mukaddem üzerime lâbis olduğum libâsımdan gayrı ism-i mâl ıtlâk olunur şeye mâlik olmayıp mu‘dim ve mu‘sir olduğum zâhir ve mütehakkık olmuşdur deyü mazmûnu min-külli’l-vücûh takrîr-i meşrûhuna mutâbık bir kıt‘a hüccet ibrâzıyla da‘vâ-yı asâr eyledikde müdde‘ûn-ı mezbûrûn cevâblarında işbu Kemel Yahûdi’nin hâlâ meblağ-ı mezbûrun safkını edâya kudreti var deyü yesârın iddi‘â ve lede’t-tezkiye makbûlü’ş-şehâde oldukları zâhir olan sarrâf tâifesinden Sahak v. Serkiz ve Mıgırdıç v. Agob ve Avram v. Bağdasar ve Mardıros v. Dinos ve Pagam v. Maynos ve Oganes v. Hokas ve Mardıros v. Toros ve Parnak v. Artin ve Anaştaş v. Apostol ve Ekmekçi Dimitri v. Mafkasar ve İsak v. Delot nâm zimmîler şehâdetleriyle bi’l-muvâcehe ber-nehc-i şer‘î isbât etmeğin mûcebince meblağ-ı mezbûru edâ ile mesfûr Kemel ilzâm olunduğu huzûr-ı âlîlerine i‘lâm olundu. Fî 18 Ra sene 1153.