Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 352 Hüküm no: 514 Orijinal metin no: [76b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Mansur b. Murad’ın kölesinin terekeden aldığı katır bahasından vârislere borcu olduğu Mahmiye-i İstanbul’da Hoca Hayreddin Mahallesi’nde sâkin iken vefât eden Mansur b. Murad’ın utekāsından Yusuf b. Abdullah mahfil-i kazâda müteveffâ-i mezbûrun eytâm-ı sıgārına kıbel-i şer‘den tesviye-i umûrlarına mansûb vasî olan işbu bâ‘isü’l-kitâb li-ebeveyn ammileri Mehmed <> Beşe b. Murad mahzarında ikrâr ve takrîr-i kelâm edip müteveffâ-i mezbûrun eytâm-ı sıgārına intikāl eden muhallefâtdan levni beynimizde ilm-i şer‘î ile ma‘lûm bir re’s katırı vasiyy-i mezbûr Mehmed Beşe yedinden semen-i misli olan yüz on kıt‘a riyâlî guruşa bâtten iştirâ ve tesellüm eyledim, semen-i mezbûr yüz on riyâlî guruş zikrolunan katır bahâsından el-ân zimmetimde lâzımü’l-edâ ve vâcibü’l-kazâ deynimdir dedikde mukırr-ı mezbûr Yusuf’u ikrâr-ı meşrûhunda vasiyy-i mezbûr Mehmed Beşe vechen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin aşer min-Zilhicceti’ş-şerîfe li-sene erba‘a ve sittin ve elf. Şuhûdü’s-sâbıkūn.