Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 546 Hüküm no: 748 Orijinal metin no: [85a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva Hatun’un komşusu Fatıma Hatun’un evine zararı olan pencerelerine tahta perde yapması Keşif Sâdır olan fermân-ı âlîlerine imtisâlen cânib-i şer‘-i mutahhardan irsâl olunan keşif nâibi Mevlânâ Hıfzı el-Hâc Mehmed Efendi dâ‘îleri hâssa mimârı hulefâsından Hüseyin ve es-Seyyid Feyzullah halîfeler ile mahmiye-i İstanbul’da Hocapaşa kurbünde Elvan mahallesinde vâki‘ mahall-i nizâ‘ın üzerine varıp ba‘de akdi’l-meclis mahalle-i mezbûrede bir bâb menzile mutasarrıfa olan sâhibe-i arzuhâl Hadîce Hatun zâtı ba‘de’t-ta‘rîfi’ş-şer‘î meclis-i ma‘kūd-ı mezkûrda menzili mukābilinde bir bâb menzile mutasarrıfa olan Havva Hatun’un vekîl-i sâbitü’l-vekâlesi Mehmed Sırrı Efendi muvâcehesinde müvekkile-i mezbûre Havva Hatun’un işbu mutasarrıfa olduğu menzilin hâriciyesinde vâki‘ tabaka-i ulyâsında bir bâb odada üç aded pencere ve yine mahall-i merkūmda sagīr odada bir aded pencere ve nerdüban başında kezâlik bir aded pencerelerinden benim kadîmî menzilimin makarr-ı nisvân olan fevkānî ve tahtânî odalarıma nezâreti ve zarâr-ı mübeyyen-i fâhişi olmağla bundan akdem mârrü’z-zikr pencerelerinde tahta havâlesi olup müvekkile-i [85b] mezbûre Havva Hatun hedm eyleyip hâlâ alâmât-ı mevcûdeleri olmağın mu‘âyene olunup zarâr-ı şer‘îsi men‘ ü def‘ olunmak matlûbumdur deyü ba‘de’d-da‘vâ ve’s-suâl müvekkile-i mezbûre Havva Hatun’un mârrü’z-zikr pencereleri mecmû‘unda muhdes ve zarâr-ı mübeyyin-i şer‘îsi olmağla an-asl havâleleri olup ba‘dehû hedm eylediğini vekîl-i mezbûr ba‘de’l-ikrâr mimârân-ı mezbûrân Müslimûn-ı hâzırûn ile ba‘de’n-nazar ve’l-mu‘âyene ber-vech-i muharrer nezâreti ve zarâr-ı şer‘îsi ve alâmât-ı mevcûdesi olduğu lede’ş-şer‘ zâhir ve mütehakkık oldukdan sonra mârrü’z-zikr pencerelere kapaklama tahta perde havâle ile zarârı def‘ olur deyü mimârân-ı mezbûrân dahi ba‘de’l-ihbâr ber-vech-i muharrer kapaklama tahta perde ile zarâr-ı şer‘îsin kadîmî üzere def‘e vekîl-i mezbûr Mehmed Sırrı Efendi’ye tenbîh eylediğini mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği huzûr-ı âlîlerine i‘lâm olundu. Fî 26 min-şehri Rebî‘ülevvel sene 1153.