Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 547 Hüküm no: 749 Orijinal metin no: [85b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kara Mustafa’nın vefatıyla oğlu İsmail’e kalan tarlalara Süleyman’ın müdahale etmemesi Ma‘rûz Anadolu’da Niğde kazâsına tâbi‘ Germiyan nâm karye ahâlîsinden olup bundan akdem vefât eden Kara Mustafa b. Ali’nin sulbî sagīr oğlu İsmail’in vâlidesi ve tesviye-i umûruna kıbel-i şer‘den mansûb vasîsi olup zâtı ta‘rîf-i şer‘î ile mu‘arrefe olan sâhibe-i arzuhâl Fâtıma bt. Osman nâm hatun Bâb Mahkemesi’nde meclis-i şer‘de derûn-ı arzuhâlde mezkûrü’l-ism Süleyman b. Ali mahzarında müteveffâ-yı mezbûrun hayâtında bâ-ma‘rifet-i sâhib-i arz taht-ı tasarrufunda olup ba‘de vefâtihî oğlum sagīr-i mezbûra intikāl-i âdî ile intikāl eden karye-i mezbûre sınırında vâki‘ lede’l-ahâlî ve’l-cîrân ma‘lûmü’l-hudûd altı kıt‘a tarlalarına mezbûr Süleyman bi-gayr-ı hakkın vaz‘-ı yed ve tasarruf etmeğin suâl olunup kasr-ı yedine tenbîh olunması bi’l-vesâye matlûbumdur deyü da‘vâ ettikde merkūm Süleyman dahi müdde‘iye-i mezbûrenin ber-vech-i meşrûh takrîri üzere altı kıt‘a tarla müteveffâ-yı mezbûrun hayâtında taht-ı tasarrufunda olup ba‘de vefâtihî oğlu sagīr-i mezbûr İsmail’e intikāl-i âdî ile intikāl eylediğini ve zikr olunan tarlalarda kat‘an kendinin alâkası olmadığını ikrâr ve i‘tirâf etmeğin mûcebince sagīr-i mezbûr İsmail’in zikri mürûr eden altı kıt‘a tarlalarına vaz‘-ı yed etmemek üzere merkūm Süleyman’a tenbîh olunmağın vasiyy-i mezbûra mârrü’z-zikr altı kıt‘a tarlalarının ma‘rifet-i sâhib-i arz ile bi’l-vesâye zabt u tasarrufuna mezbûr Süleyman’a ta‘arruz ve müdâhale etmemek üzere vasiyy-i mezbûre Fâtıma Hatun yedine hükm-i hümâyûn sadaka ve ihsân buyrulmak istirhâm eylediği huzûr-ı âlîlerine i‘lâm olundu. Fî 29 min-Rebî‘ülevvel sene 1153.