Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 547 Hüküm no: 750 Orijinal metin no: [85b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hanım’ın tasarrufundaki miri bostana pis suların akıtılmaması ve çöp atılmamasının tenbihi Keşif, Kırımî zamânında Ma‘rûz Sâdır olan fermân-ı âlîlerine imtisâlen cânib-i şer‘-i mutahhardan irsâl olunan keşif nâibi Mevlânâ Hıfzı el-Hâc Mehmed Efendi dâ‘îleri hâssa mimârlarından Hüseyin Halîfe ile mahmiye-i İstanbul’da Yenibahçe kurbünde Karabaş mahallesinde vâki‘ Istabl-ı âmire-i evvel tevâbi‘inden mîrî bostana varıp huzûr-ı Müslimînde ba‘de akdi’l-meclis bostan-ı merkūma mîrî maktû‘ ile mutasarrıf olan sâhibe-i arzuhâl İsmihan Hanım’ın zevci vekîl-i sâbitü’l-vekâlesi el-Hâc Süleyman Ağa meclis-i ma‘kūd-ı mezkûrda derûn-ı arzuhâlde isimleri mastûr Karabaş mahallesi ahâlîsinden Mustafa Çelebi ve İbrahim Çelebi ve Şa‘bân ve Halil Beşe ve Mehmed Efendi ve Âişe Hatun ve Yusuf Beşe ve Eyüb Efendi ve Hasan Odabaşı ve Canbaz Yusuf ve Hadîce Hatun tarafından vekîl-i sâbitü’l-vekâlesi Mehmed Odabaşı ve Akşemseddin mahallesi ahâlîsinden Sîmkeş Mehmed ve Canbaz Mehmed Beşe muvâcehelerinde mezbûrûnun sokak kapıları âhar mahalde olduğundan mâ‘adâ işbu mu‘âyene olunan bostan-ı merkūma kapı ve pencereler ihdâs ve mezbele ve çirkâb suyu ilkā ve icrâ eylediklerinden mâ‘adâ ba‘zı hayvanâtlarını salıverip eşcâr-ı müsmirelerine ta‘arruz ve ol vechile zarâr-ı fâhişleri olduğundan kapıları sed ve bend olunmak üzere bundan akdem bin yüz kırk senesi şehr-i Rebî‘ülevvelinin onuncu günü târîhiyle müverrah ve târîh-i mezkûrda küşâd olan Mehmed Emin Efendi imzâsıyla mümzâ ve mahtûm bir kıt‘a hüccet-i şer‘iyye birle tenbîh olunmuş iken mezbûrûn mütenebbih olmamalarıyla ber-mûceb-i hüccet men‘ ü def‘ olunmak matlûbumdur deyü bi’l-vekâle da‘vâ ve mazmûnu min-külli’l-vücûh takrîrine mutâbık bir kıt‘a hüccet-i şer‘iyye ibrâz ettikde ba‘de’l-istintâk mezbûrûndan her biri mazmûn-ı hüccet-i mezkûreyi ba‘de’l-ikrâr tavassut-ı muslihîn ile mârrü’z-zikr bostana mezbele ve çirkâbı ilkā ve icrâ ve eşcâra ve magrûsâtlarına bir tarîkle ta‘arruz etmemek üzere müte‘ahhidler oldukda vekîl-i mezbûre dahi râzı olup bu vechile kat‘-ı nizâ‘ eylediklerin mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ eylediği huzûr-ı âlîlerine i‘lâm olundu. Fî 25 min-Rebî‘ülevvel sene 1153.