Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 548 Hüküm no: 751 Orijinal metin no: [85b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe’ye olan borçlarından dolayı hapsedilen Artin ve Agob’un fakir olmaları sebebiyle ödeme güçleri olmadığından salıverilmesi Ma‘rûz Derûn-ı arzuhâlde mezkûrü’l-ism Osman nâm kimesneye ber-mûceb-i i‘lâm seksen yedi guruş deynleri için târîh-i derkenârdan târîh-i i‘lâma gelince sicn-i sultânîde mahbûs olan ashâb-ı arzuhâl Artin ve Agob nâm zimmîler dâyinleri mezbûr Osman Beşe ile fermân-ı âlîlerine imtisâlen mahbûsen mürâfa‘a-i şer‘ olduklarında mezbûr Osman Beşe mezbûrân Artin ve Agob’un meblağ-ı mezbûr seksen yedi guruşu hâlâ ve def‘aten edâya iktidârları vardır deyü yesârlarını da‘vâ ve mesfûrân dahi meblağ-ı mezbûru hâlâ ve def‘aten edâya iktidârımız yokdur deyü asârlarını da‘vâ ettiklerinde yesâr beyyinesi evlâ olmağın evvelâ mezbûr Osman Beşe ‘den mesfûrânın yesârına beyyine taleb olundukda ityân-ı beyyineden ızhâr-ı acz edip sâniyen mesfûrân Artin ve Agob’dan asârlarına beyyine taleb olundukda udûl-ı ahrâr-ı ricâl-i Müslimînden husûs-ı mezbûra vukūf-ı tâmmı olan İmâm Mehmed Efendi b. Ali ve Müezzin Ahmed Halîfe b. Mehmed ve Mehmed b. Abdullah nâm kimesneler mesfûrân Artin ve Agob’un meblağ-ı mezbûr seksen yedi guruşu hâlâ ve def‘aten edâya iktidârları olmayıp lâbis oldukları köhne libâslarından gayrı ism-i mâl ıtlâk olunur bir nesneye mâlikler olmayıp müflis ve mu‘dim ve mu‘sir olduklarını mezbûr Osman muvâcehesinde vech-i şer‘î üzere edâ-i şehâdet-i şer‘iyye ettiklerinde gıbbe ri‘âyeti şerâiti’l-kabûl şehâdetleri makbûle olmağın mûcebince mesfûrân Artin ve Agob’un si‘at-i hâllerine değin habsleri meşrû‘ olmadığı Bâb Mahkemesi’nde ba‘de’t-tescîl huzûr-ı âlîlerine i‘lâm olundu. Fî 2 min-şehri Rebî‘ülâhir sene 1153.