Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 549 Hüküm no: 752 Orijinal metin no: [86a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın sahip olduğu mülk ve vakıf evdeki hakkını boşandığı hanımı Fatıma Hatun’a sattığı Keşif, Kırımî zamânında Derûn-ı arzuhâlde mezkûr menzil husûsi’çün cânib-i şer‘-i mutahhardan irsâl olunan Hıfzı el-Hâc Mehmed Efendi dâ‘îleri hâssa mimâr kâtibi el-Hâc Mustafa Efendi ve Halil ve İbrahim nâm halîfeler ile mahmiye-i İstanbul’da Sultan Bayezid-i cedîd mahallesinde Fâtıma nâm hatunun sâkine olduğu menzile varıp huzûr-ı Müslimînde ba‘de akdi’l-meclis derûn-ı arzuhâlde ismi mezkûr Hüseyin Ağa meclis-i ma‘kūd-ı mezkûrda zevce-i mutallakası olup zâtı ba‘de’t-ta‘rîfi’ş-şer‘î sâhibe-i arzuhâl mezbûre Fâtıma Hatun muvâcehesinde işbu akd-i meclis-i şer‘-i şerîf olan mülk menzilin ve yine menzil-i mezkûr derûnunda Kîsedâr Mehmed Efendi Vakfı’ndan olan menzil ber-vech-i münâsafe müşâ‘ u müşterek olup bin yüz elli bir senesi Şa‘bân-ı şerîfinin yirmi birinci gününden târîh-i i‘lâma gelince mâlımdan emriyle bi-şartı’r-rücû‘ menzileyn-i mezkûreyne müceddeden münakkaş ve müzeyyen bir bâb oda ve iki köşk ve bir su hazînesi ve bir hamam ve bir kârgîr matbah ocağı ve sâir mevâzi‘-i müteferrikalarını ta‘mîr ve tecdîd ve akçe-i vâfire harc ü sarf edip menzileyen-i mezkûreyn taksîm ve masrûfâtımı taleb ve da‘vâ sadedinde iken tavassut-ı muslihîn ile mülkiyet üzere mutasarrıf olduğum nısf menzilimi bin dokuz yüz elli guruş semen-i ma‘lûma mezbûre Fâtıma Hatun’a bey‘ ve temlîk ve teslîm ol dahi iştirâ ve temellük ve tesellüm ve kabûl ve mârrü’z-zikr menzil-i mevkūfe dahi dört yüz elli guruş bedel mukābelesinde bâ-ma‘rifet-i mütevellî ferâğ ve tefvîz ol dahi tefevvüz ve kabûl eylediğinden sonra dört yüz guruşunu meclis-i merkūmda bana def‘ ü teslîm edip bâkī kalan iki bin guruşu işbu târîh-i i‘lâmdan on bir gün tamâmında edâ etmek üzere tecîl eylediğimde mezbûre Fâtıma Hatun ber-vech-i muharrer ecel-i mezkûru kabûl ve müddet-i mezkûre tamâmında meblağ-ı mezbûru edâya ta‘ahhüd etmekle fîmâ-ba‘d menzileyn-i mezkûreynde kat‘an alâkam kalmayıp menzileyn-i mezbûreyne ve ta‘mîrât-ı mezkûreye müte‘allıka âmme-i da‘vâdan her biri âharın zimmetlerini ibrâ ve ıskāt eyleyip kat‘-ı nizâ‘ eylediklerin mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği huzûr-ı âlîlerine i‘lâm olundu. Fî 24 min-Rebî‘ülvvel sene 1153.