Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 550 Hüküm no: 753 Orijinal metin no: [86a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim’in tasarrufundaki vakıf dükkânda olan hakkını Ali Odabaşı ve Fatıma’ya sulh bedeli karşılığı sattığı Ma‘rûz Arzuhâl eden İbrahim derûn-ı arzuhâlde ve i‘lâmda mastûr olduğu üzere hasımları el-Hâc Ali Odabaşı ile Fâtıma’nın vekîl-i sâbitü’l-vekâlesi Hâfız Mehmed’den mahmiye-i İstanbul’da Karaki kapısında Acem Hüseyin Efendi Evkāfı’ndan dört kepenk bir bâb bakkāl dükkânının nısfı benim ve nısf-ı âharı ammim müteveffâ Hüseyin’in tasarrufunda olup mezbûr Hüseyin fevt oldukda mütevellî-yi vakf mecmû‘ dükkân mahlûldür deyü mezbûrâna îcâr etmekle ben nısf hissemi bundan akdem taleb eylediğimde ba‘de’l-münâza‘a dört yüz yetmiş guruşa musâlaha ve bedel-i sulhün yetmiş guruşunu yedlerinden kabz edip bâkī dört yüz guruşu da‘vâ eylediğimde onlar dahi sulh-ı mezkûr ancak yetmiş guruşa olup meblağ-ı mezkûru yedimizden ba‘de’l-ahz âmme-i da‘vâdan zimmetimizi ibrâ etmiş idik deyü def‘-i meşrûhlarını isbât sadedinde olduklarında tavassut-ı muslihîn ile da‘vâ-yı mezkûremden beni altmış guruş bedel-i makbûza sulh ben dahi ba‘de’l-kabûl da‘vâ eylediğim dört yüz guruşa ve dükkân-ı mezkûra müte‘allıka âmme-i de‘âvîden mezbûrânın zimmetlerini ibrâ ve ıskāt eylediğimde onlar dahi bana medfû‘ları olan altmış guruşa müte‘allıka da‘vâdan benim zimmetimi ibrâ ve ıskāt eylediler dedikde ba‘de’t-tasdîk bu vech üzere kat‘-ı nizâ‘ eyledikleri huzûr-ı âlîlerine i‘lâm olundu. El-emru li-men-lehü’l-emr. Fî 5 min-Rebî‘ülâhir sene 1153.