Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 550 Hüküm no: 754 Orijinal metin no: [86a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Agob’un ipek ücretinden Mehmed’e olan borcunu ödemesi Bâ-mühr-i efendi Ma‘rûz Arzuhâl eden el-Hâc Mehmed hasmı Agob zimmîden işbu yedimde olan temessük mûcebince beynlerinde ma‘lûmü’l-vasf ve’l-mikdâr ipek bahâsından iki yüz altmış altı guruş hakkım olup seksen üç guruşunu bundan akdem bana edâ ve bâkī yüz seksen üç guruşun seksen üç guruşuna dahi işbu meclis-i şer‘de mu‘âyene olunan iki tahta çilkafa kürkü bana bey‘ ve temlîk ve teslîm ben dahi iştirâ ve tesellüm ve temellük edip zimmetinde yüz guruş hakkım bâkī kalmağla taleb ederim deyü dîvân-ı âlîlerinde ma‘kūd-i meclis-i şer‘de da‘vâ ol dahi bâ-temessük deyni olan meblağ-ı mezbûr iki yüz altmış altı guruşun edâ eylediği seksen üç guruşundan mâ‘adâ yüz seksen üç guruş hâlâ zimmetinde deyni olduğunu ikrâr ve i‘tirâf lâkin zikr olunan iki tahta çilkafa kürkü müdde‘î-i mezbûra rehin olmak üzere vermiş idim deyü da‘vâ ve bey‘-i mezkûru bi’l-külliye inkâr edicek mezbûr el-Hâc Mehmed bey‘-i mezkûru lede’t-tezkiye adâletleri zâhir şuhûd-ı udûl ile ba‘de’l-isbât ve’l-hükm semen-i mezkûr seksen üç guruş meblağ-ı bâkī yüz seksen üç guruşun seksen üç guruşuna ba‘de’t-takas merkūm Agob zimmetinde bâkī kalan yüz guruşu alâ-mûcibi ikrârihî mezbûr el-Hâc Mehmed’e edâya merkūm Agob’a tenbîh olunduğu huzûr-ı âlîlerine i‘lâm olundu. Fî 5 min-Rebî‘ülâhir sene 1153.