Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 551 Hüküm no: 756 Orijinal metin no: [86b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şahin’in aldığı borca karşılık evini vefaen Ahmed Efendi’ye sattığını kabul edip fazladan atmış guruş aldığını reddettiği Arzuhâl eden Ahmed Efendi târîh-i i‘lâmdan beş gün mukaddem Bâb Mahkemesi’nde meclis-i şer‘de derûn-ı arzuhâlde mezkûrü’l-ism Şahin b. Abdullah nâm kimesne muvâcehesinde zikri âtî vakıf menzilin evlâdiyet ve meşrûtiyet üzere mütevellîsi diğer Ahmed Efendi hâzır olduğu halde bundan akdem mezbûr Şahin’e bir def‘a yirmi dokuz buçuk guruş ve bir def‘a altmış guruş ve bir def‘a dahi otuz guruş ve bir def‘a dahi kırk guruş ki min-haysü’l-mecmû‘ yüz elli dokuz buçuk guruş ikrâz ve teslîm ettiğimde ol dahi ba‘de’l-istikrâz ve’l-kabz ve’l-istihlâk merhûm Hoca Mustafa Efendi beher şehr otuz akçe icâre-i müeccelelü mutasarrıf olduğu Keçeci Pîrî mahallesinde vâki‘ ma‘lûmü’l-hudûd vakıf menzili bi-tarîkı’l-vefâ bana ferâğ ve tefvîz ben dahi ber-vech-i muharrer tefevvüz ve kabûl etmiş idim lâkin ferâğ-ı mezkûr vefâen olmağla menzil-i mezbûr red ve meblağ-ı mecmû‘-ı mezbûru mezbûr Şahin’den taleb ederim deyü da‘vâ ettikde ol dahi cevâbında menzil-i mezbûru müdde‘î-i merkūm Ahmed Efendi’ye bâ-ma‘rifet-i mütevellî bi-tarîkı’l-vefâ ferâğını ve yirmi dokuz buçuk guruş kabzını ikrâr mâ‘adâyı inkâr eylediğinde müdde‘î-i merkūm zikri sebk eden altmış guruşu iki nefer şâhidin şehâdetleriyle isbât edip lâkin şâhideyn-i mezkûreyn henüz ta‘dîl ve tezkiye olunmayıp müdde‘î-i merkūm Ahmed Efendi ziyâde müdde‘âsı’çün beyâna havâle olunduğu sâdır olan fermân-ı âlîlerine imtisâlen huzûr-ı âlîlerine i‘lâm olundu. Fî 5 min-şehri Rebî‘ülâhir sene 1153.