Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 552 Hüküm no: 757 Orijinal metin no: [86b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimar Kemâl mahallesi imamı ve ahalisi ile handa çalışan oda sahiplerinin handa gayrimüslim çalışmaması hususunda ittifâk ettikleri Ma‘rûz Arzuhâl eden Mimâr Kemâl mahallesi imâmı İsmail Efendi b. Hasan ve ahâlîsinden Hatîb Mustafa Efendi b. Hasan ve Kayyım Ali Çelebi b. Abdullah ve Müezzin el-Hâc İbrahim b. İsmail ve Osman b. Mustafa ve el-Hâc İbrahim b. İsmail ve el-Hâc İsmail b. Mustafa ve el-Hâc Mehmed b. Mustafa ve Mehmed b. Hüseyin ve Mehmed Çelebi b. Mehmed ve diğer Mehmed b. Mehmed ve Şatır Ali Ağa b. Mustafa ve İbrahim Ağa b. Mustafa nâm kimesneler derûn-ı arzuhâlde mezkûr han ashâbından on beş odaya mutasarrıf Mustafa Ağa b. Mustafa ve on iki oda ile bir bodruma mutasarrıf İsmail b. Mustafa ve beş odaya mutasarrıf es-Seyyid Mehmed Çelebi b. Hacı Ali ve dört odaya mutasarrıf Mehmed Çelebi b. el-Hâc İsmail ve bir odaya mutasarrıf Ali Çelebi b. Mehmed dört odaya mutasarrıf Ömer Çelebi b. Ahmed ve dört odaya mutasarrıf el-Hâc Mustafa b. el-Hâc Mehmed ve iki odaya mutasarrıf Şalcızâde Ahmed Çelebi ve iki odaya mutasarrıf mezbûr Ahmed Çelebi’nin hemşîresi Fâtıma Hatun ve bir odaya mutasarrıf diğer Ahmed Çelebi ve bir odaya mutasarrıf Peştemâlci Ahmed Çelebi Mahkeme-i Bâb’da zikr olunan handa kefere sâkine olup câmi‘-i şerîf civârında taklîl-i cemâ‘ate bâ‘is olduğundan mâ‘adâ nice mefsedeye dahi bâdî olmağla fîmâ-ba‘d kat‘an kefere sâkine olmayıp yarar kefîli ehl-i ırz Müslüman iskân edip mechûlü’l-ahvâl gayr-ı ma‘lûmü’l-etvâr kimesneleri min-ba‘d han-ı mezkûrda iskân etmemek üzere ittifâk ü ittihâd ve ashâb-ı handan beş odaya mutasarrıf mezbûr es-Seyyid Mehmed Çelebi şurût-ı mezkûreye mürâ‘at etmek üzere han odabaşısı nasb u ta‘yîn ve cümlesinin rızâlarıyla bu vech üzere kat‘-ı nizâ‘ eyledikleri huzûr-ı âlîlerine i‘lâm olundu. Fî 5 min-şehri Rebî‘ülâhir sene 1153.