Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 553 Hüküm no: 759 Orijinal metin no: [86b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed adlı çocuğun vefat eden annesine borcu olan Ayşe’nin borcunun kocası tarafından ödendiği Ma‘rûz Mehmed nâm sagīrin babası ve kıbel-i şer‘den mansûb vasîsi Hasan nâm kimesne Bâb Mahkemesi’nde meclis-i şer‘a ihzâr ettirdiği Bostânî İbrahim mahzarında sagīr-i mezbûrun müteveffiye vâlidesi mâlından mezbûr İbrahim’in zevece-i menkûhası gāibetü ani’l-meclis Âişe bt. Abdullah b. Abdurrahman nâm hatun zimmetinde cihet-i karzdan yirmi iki buçuk guruş hakkı olup meblağ-ı mezbûrun edâsına zevci mezbûr İbrahim bi’l-emr ve’l-kabûl kefâlet-i sahîha ile kefîl olmağın kefâlet-i mezkûresine binâen meblağ-ı mezbûr yirmi iki buçuk guruşu mezbûr İbrahim’den bi-hükmi’l-kefâle bi’l-vesâye taleb ederim deyü ba‘de’d-da‘vâ ve’l-inkâr vasiyy-i merkūm ber-vech-i muharrer müdde‘âsını lede’t-tezkiye adâletleri zâhir olan Ali b. Mehmed ve Salih b. Mustafa şehâdetleriyle vech-i şer‘î üzere mezbûr İbrahim muvâcehesinde ba‘de’l-isbât etmeğin mûcebince ba‘de’l-hükm ve’t-tenbîh vasiyy-i mezbûr Hasan meclis-i mezkûda ânifen edâya tenbîh olunan yirmi iki buçuk guruşu mezbûr İbrahim’in yedinden bi’l-vesâye ahz u kabz eyledim deyü ikrârı ba‘de’t-tasdîk tescîl ve huzûr-ı âlîlerine i‘lâm olundu. Fî 5 min-Rebî‘ülâhir sene 1153.