Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 556 Hüküm no: 766 Orijinal metin no: [87a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Ağa’nın berber dükkânı üzerine yaptırdığı binanın saçağını kesmesi Ma‘rûz Sâdır olan fermân-ı âlîlerine imtisâlen cânib-i şer‘den irsâl olunan keşif nâibi Mevlânâ Hıfzı el-Hâc Mehmed Efendi dâ‘îleri hâssa mimârlarından Şa‘bân ve Halil Halîfeler ile mahmiye-i İstanbul’da Süleymaniye kurbünde Kâtib Şemseddin mahallesinde vâki‘ mahall-i nizâ‘ın üzerine varıp huzûr-ı Müslimînde ba‘de akdi’l-meclis arsası merhûm Mimâr Sinan Vakfı’ndan ve binâsı mülk bir bâb kebîr menzile mutasarrıf olan sâbıkā Ser-gulâm-ı bakı sâhib-i arzuhâl Abdi Ağa meclis-i ma‘kūd-ı mezkûrda câr-ı mülâsıkı olup yine vakf-ı mezbûrdan iki bâb berber dükkânına mutasarrıf olan Halil muvâcehelerinde vakf-ı mezbûrun evlâdiyet ve meşrûtiyet üzere mütevellîsi olan İbrahim Ağa hâzır olduğu halde dökmeciler tarafından işbu mu‘âyene olunan taş duvar mimârân-ı mezbûrân mesâhaları üzere berber dükkânına gelince on yedi zirâ‘ on sekiz parmak ve mezbûr Halil’in mutasarrıf olduğu dükkânlar tarafı yedi zirâ‘ on sekiz parmak ve mezbûre Fâtıma’nın tasarrufunda olan dükkân tarafı dört buçuk zirâ‘ mütevellî-yi vakf temessükü ve hüccet-i şer‘iyye mantûkunca müstakıllen taht-ı tasarrufumda olup bin yüz kırk senesinde bâyi‘ Mustafa Ağa İran cânibinde iken mezbûre Fâtıma Hatun dükkân ve üzerinde odasını ta‘mîr eyledikde duvar-ı mezkûr üzerine tûlen dört buçuk zirâ‘ ve arzen on parmak bi-gayr-ı hakkın binâ ve vaz‘ eylediğinden mâ‘adâ tûlen dört buçuk ve arzen on bir zirâ‘ saçak dahi ihdâs etmekle suâl olunup bi-gayr-ı hakkın vaz‘ eylediği binâ ve saçağı kat‘ olunmak matlûbumdur deyü ba‘de’d-da‘vâ ve’n-nazar vaz‘-ı yedi müte‘ayyen oldukdan sonra duvar-ı mezkûr müdde‘î-i mezbûr Abdi Ağa’nın taht-ı tasarrufunda olduğunu mezbûrân Fâtıma Hatun ve Halil ba‘de’l-ikrâr ve’l-i‘tirâf mütevellî-yi vakf dahi tasdîk etmekle mârrü’z-zikr saçağı meclis-i ma‘kūd-ı merkūmda kat‘ ve ber-vech-i muharrer mezbûre Fâtıma Hatun’un duvar-ı merkūmda dört buçuk zirâ‘ on parmak binâsını müdde‘î-i merkūm rızâsıyla alâ-hâlihî terk ve suyunu kurşun oluk ile mezbûre Fâtıma’nın hânesine icrâya ta‘ahhüd ve bu vechile kat‘-ı nizâ‘ eylediklerini mevlânâ-yı mezbûr mahallinde ba‘de’t-tahrîr ümenâ-i şer‘le gelip haber verdikleri huzûr-ı âlîlerine i‘lâm olundu. Fî 10 min-Rebî‘ülâhir sene 1153.