Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 353 Hüküm no: 516 Orijinal metin no: [77a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Rıdvan b. Abdullah’ın terekesini emaneten elinde bulunduran el-Hâc Ahmed’in terekeyi vârislerine teslim ettiği Kasaba-i Tophâne’de sâkin iken vefât eden Rıdvan b. Abdullah nâm müteveffânın verâseti zevce-i metrûkesi Hadice bt. Abdullah nâm hatun ile zî-rahm cihetinden Mustafa Ağa’ya münhasıra olduğu şer‘an mütebeyyen oldukdan sonra mezbûre Hadice asâleten ve mezbûr Mustafa Ağa tarafından husûs-ı âti’l-beyâna vekîl olup Derviş Bey b. Abdullah ve Kaya b. Kalender şehâdetleri ile vekâleti sâbite olan es-Seyyid İbrahim Çelebi b. es-Seyyid Hüseyin vekâleten mahfil-i kazâda işbu râfi‘u’l-kitâb el-Hâc Ahmed b. Süleyman mahzarında herbiri ikrâr ve takrîr-i kelâm edip müteveffâ-i mezbûrun mezbûre Hadice’ye ve müvekkil-i mezbûra isâbet eden muhallefâtından yirmi yedi bin nakid akçe ile evsâfı beynlerinde ma‘lûm Kenan b. Abdullah nâm gulâmı mezbûr el-Hâc Ahmed’e emânet vaz‘ edip ol dahi emânet ahz u kabz eylemiş idi. Mezbûr Kenan bi-emri’llâh vefât edip meblağ-ı mezbûr yirmi yedi bin akçeyi mezbûr el-Hâc Ahmed yedinden ahz u kabz eyledik, bir akçe ve bir habbe bâkī kalmadı dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: el-Hâc Ramazan b. Ömer, Hasan Beşe b. Abdullah, Kabil Beşe b. Abdullah, Pîrî Beşe b. Hüseyin ve gayruhum.