Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 566 Hüküm no: 786 Orijinal metin no: [89a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirnekapı’daki Çınarlıçeşme’nin suyunun Rıdvan Hatun’un vakfettiği bostana cereyanına İbrahim’in engel olmaması Zikri âtî vakfın mütevellîsi sâhib-i arzuhâl el-Hâc Yusuf Ağa Bâb Mahkemesi’nde meclis-i şer‘de İbrahim nâm kimesne muvâcehesinde merhûm Yakub Ağa nâm sâhibü’l-hayrın Edirnekapısı dâhilinde Neslişah Sultan mahallesinde binâ eylediği Çınarlıçeşme demekle ma‘rûf çeşmenin ayağı kadîmden bu âna gelince yine mahalle-i mezbûrede vâki‘ mütevellîsi olduğum Rıdvan Hatun nâm sâhibetü’l-hayrın bostanına cereyân edip suyundan intifâ‘ olunagelmiş iken mezbûr İbrahim mârrü’z-zikr suyun bostan-ı mezkûra cereyânına bi-gayr-ı vechin müdâhale ve vakf-ı şerîfe gadr etmekle ahâlî-i mahalle-i mezbûreden husûs-ı mezbûra vukūf-ı tâmları olan işbu hâzır bi’l-meclis kimesnelerden ba‘de’l-istihbâr merkūm İbrahim’in bî-vech müdâhalesi men‘ ü def‘ olunması bi’t-tevliye matlûbumdur dedikde hakīkat-i hâl mahalle-i mezbûre imâmı es-Seyyid Mustafa Efendi ve müezzini Molla Mehmed ve Mustafa Efendi ve es-Seyyid Mehmed Çelebi ve es-Seyyid Ahmed Çelebi ve Hasan Çelebi ve el-Hâc Hüseyin ve sâir müseccelü’l-esâmî kimesnelerden istihbâr olundukda fi’l-vâki‘ hâl mütevellî-yi merkūmun takrîr-i meşrûhu üzere olduğunu her biri alâ-tarîkı’ş-şehâde meclis-i şer‘de haber verdiklerinde mûcebince mezbûr İbrahim mârrü’z-zikr suyun bostan-ı mezkûra cereyânına mümâna‘at etmemek üzere tenbîh olunduğu huzûr-ı âlîlerine i‘lâm olundu. Fî 17 min-Rebî‘ülâhir sene 1153.