Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 354 Hüküm no: 518 Orijinal metin no: [77a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Beşe b. Abdullah’ın azat ettiği cariyesi kızına bazı eşyaları ve bir miktar parayı hibe ettiği Mahmiye-i İstanbul’da Hoca Hamza Mahallesi’nde sâkin Sinan Beşe b. Abdullah nâm râcil meclis-i şer‘de câriye-i mu‘takası Bağıcinân bt. Abdullah’dan mütevellîde Hasene bt. Mehmed Beşe tarafından ikrâr-ı âti’l-beyânı tasdîka vekîl [ve] vekâleti Ali Efendi b. Mustafa ve İsmail Çelebi b. İbrahim Efendi şehâdetleri ile şer‘an sâbite olan babası mezbûr Mehmed Beşe b. Mustafa mahzarında ikrâr ve takrîr-i kelâm edip silk-i mülkümde münselik olan eşyâmdan beynimizde ilm-i şer‘î ile ma‘lûm samur kaplı bir mâî ferâce ve bir köhne neftî sancaklı ferâce ve iki köhne beledî döşek ve üç köhne kilim ve iki köhne velence ve bir köhne muhattem kuşak ve iki müsta‘mel sepet sandıkları ve üç tencere ve bir küçük güğüm ve gāibe ani’l-meclis Âişe Hanım nâm hatun zimmetinde olan yüz aded riyâlî guruş ile sâkin olduğum menzilimde ism-i mâl ıtlâk olunur beynimizde ma‘lûm cümle eşyâyı müvekkile-i mezbûre Hasene’[ye] hibe-i sahîha-i şer‘iyye ile hibe ve temlîk ve teslîm edip ol dahi meclis-i hibede ittihâb ve kabz ve kabûl ve tesellüm eyledikde meblağ-ı mezbûru dahi kabzına merkūme kimesneyi taslît eyledim, ba‘de’l-yevm zikrolunan eşyâ ve meblağ-ı mezbûr müvekkile-i merkūme Hasene’nin mülk-i mevhûbu olmuşdur, keyfe mâ yeşâ’ mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Ahmed Efendi el-imâm, Hüseyin Ağa b. Abdullah, el-Hâc Mustafa b. dâmâd-ı Siyavuş Paşa, Ahmed Bey b. Siyavuş, <> İbrahim Çelebi b. Halil, Vefâyî Abdullah b. Abdülmennan, Musa Ağa b. Hüseyin el-bevvâb-ı sultânî, el-Hâc Eyüb b. Abdurrahman, İsmail Çelebi b. İbrahim, Ali Bey b. Mehmed, İbrahim b. Halil, Oruc b. Kemal, Bayram Beşe b. İsmail, Halil Beşe b. Pîrî, Rıdvan b. Abdullah ve gayruhum.