Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 354 Hüküm no: 519 Orijinal metin no: [77a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panos v. Toros’un un alması için rehin verdiği mücevherlerin, un alımı gerçekleşmediğinden iadesi gerektiği İşbu bâ‘isü’l-kitâb Panos v. Toros nâm zimmî mahfil-i kazâya Marat v. Kirkor’u ihzâr ve üzerine da‘vâ edip mezbûr Marat bana unculardan işleyip veresiye un alıver deyü yirmi bir miskāl tek altın bilezik ile bir incili alın bağlığı rehin tarîki ile def‘ ve teslîm edip ol dahi zikrolunan bilezik ve bağlığı vech-i muharrer üzere kabz ve tesellüm eylemiş idi. Lâkin bana un alıvermemekle ol bilezik ve bağlığı taleb ederim suâl olunsun dedikde, gıbbe’s-suâl mezbûr Marat fi’l-vâki‘ müdde‘î-i mezbûrdan zikrolunan bilezik ve bağlığı vech-i muharrer üzere alıp üç bin sekiz yüz seksen akçelik un alıverdim, ol meblağı bana teslîm edip rehinlerini kabz eylesin deyü cevâb vericek gıbbe’l-istintak ve akībe’l-inkâr mezbûr Marat’dan beyyine taleb olundukda ikāmet-i beyyineden ızhâr-ı acz ile istihlâf edip mezbûr Panos’a yemîn teklîf olundukda ol dahi hasebi’l-mesûl yemîn bi’llâhi’llezî enzele’l-İncîle alâ-Îsâihî etmek sadedinde iken mezbûr Marat merkūm Panos’a yemîn verdirmeyip zikrolunan rehinlerini teslîm etmeye müte‘ahhid olmağın mâ-hüve’l-vâki‘ bi’t-taleb ketb olundu. Hurrire fi’l-yevmi’s-sâmin aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Halil Beşe b. Lütfu[llah], İbrahim Çelebi b. Davud, Pîrî b. Hüseyin, Rıdvan [b.] Abdullah, Hüseyin b. Osman ve gayruhum.