Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 569 Hüküm no: 794 Orijinal metin no: [89b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Evlerine uygunsuz kadınlar aldıkları için Ali Çorbacı ve Zeyneb Hatun’un başka bir mahalleye gönderilmeleri İstanbul’da Zeyrek kurbünde Çivizâde mahallesi imâmı Mehmed Efendi ve müezzini Mehmed Halîfe ve ahâlîsinden Mehmed Çelebi ve İsmail Ağa ve Hüseyin Odabaşı ve Mehmed Efendi ve el-Hâc İbrahim ve Abdullah Odabaşı ve Molla Hüseyin ve Molla Mustafa ve Molla Murtaza ve Molla Ahmed ve İslâm nâm kimesneler ve sâirleri Bâb Mahkemesi’nde meclis-i şer‘de mahalle-i mezbûre sükkânından olup Mumcu Mehmed Beşe mübâşeretiyle ihzâr ettirdikleri Ali Çorbacı b. Hasan ve zevcesi Zeyneb Hatun muvâcehelerinde mezbûr Ali Çorbacı zevcesi mezbûreyi zabt u rabta kādir olmayıp menziline bî-edeb gûnâ-gûn avratlar gelip mezbûr Zeyneb Hatun dahi nâ-mahremden tehâşî ve ictinâb etmemekle cümlemiz kendülerden müteezzî ve bir vechile emniyet ve râhatımız yokdur deyü teşekkî ve âhar mahalleye ihrâc olunmaları murâdımızdır deyü da‘vâ eylediklerinde mûcebince merkūm Ali Çorbacı ve zevcesi mezbûre Zeyneb Hatun âhar mahalleye nakle tenbîh olunduğu bi’l-iltimâs huzûr-ı âlîlerine i‘lâm olundu. Fî 23 min-Rebî‘ülâhir sene 1153.