Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 571 Hüküm no: 799 Orijinal metin no: [89b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed’in eski evinin üzerine oda ilavesi davasında sulh olduğu Keşf Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibi Mevlânâ Hıfzı el-Hâc Mehmed Efendi dâ‘îleri ve hâssa mimârlarından el-Hâc Süleyman ve Hüseyin ve Halil Halîfeler ile mahmiye-i İstanbul’da Süleymaniye kurbünde Kâtib Şemseddin mahallesinde vâki‘ sâhib-i arzuhâl el-Hâc Mehmed’in menziline varıp mahalle-i mezbûre ahâlîsinden mazbûtü’l-esâmî Müslimîn huzûrlarında akd-i meclis-i şer‘-i şerîf ettikde mezbûr el-Hâc Mehmed meclis-i ma‘kūd-ı mezkûrda derûn-ı arzuhâlde mezkûrü’l-ism câr-ı mülâsıkı Şeyh Mustafa Efendi mahzarında işbu akd-i meclis-i şer‘ olunan menzilimin mimârân-ı mezbûrân mesâhaları üzere dokuz zirâ‘ beş parmak mevcûd atîk ebniyem üzerine iki bâb oda binâ eylemek murâd eylediğimde mezbûr Şeyh Mustafa Efendi bi-gayr-ı hakkın kiremidimin üzerine beş aded pencere küşâd ve hakk-ı kanadı dahi yok iken kanad vaz‘ ve ihdâs eylediğinden mâ‘adâ benim menzilimin duvarı dibinde iki aded kenîf ihdâs edip duvarıma vehn târî olmağla suâl olunup zarârını def‘e mezbûr Şeyh Mustafa Efendi’ye tenbîh olunmak murâdımdır deyü ba‘de’d-da‘vâ ve’l-münâza‘a beynlerine muslihûn tavassut edip mezbûr Şeyh Mustafa Efendi’nin kanad vaz‘ına mümâna‘at etmeyip hava ve ziyâya mâni‘ olur deyü tasaddî eylediği da‘vâsından fâriğ olup mezbûr Mustafa Efendi dahi ber-vech-i muharrer müceddeden binâ eyleyeceği ebniyesinde bî-vech mümâna‘at etmemek üzere kat‘-ı nizâ‘ eylediklerini mevlânâ-yı mezbûr mahallinde ba‘de’t-tahrîr ümenâ-i şer‘le meclis-i şer‘a gelip alâ-vukū‘ihi inhâ eylediği huzûr-ı âlîlerine i‘lâm olundu. Fî 8 min-şehri Rebî‘ülâhir sene 1153.