Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 573 Hüküm no: 803 Orijinal metin no: [90a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Foti’yi öldüren Kostantin’in diyeti varislere ödemesi Ma‘rûz Kâtib Muslihiddin mahallesinde katîlen hâlik olan Terzi Foti’nin verâseti zevcesi Zakari’ye ve anası Korgona ve li-ebeveyn karındaşı Londari’ye münhasıra ve tashîh-i meseleleri on iki sehmden olup sihâm-ı mezkûreden üç sehmi zevcesi mezbûre Zakari’ye ve dört sehmi anası merkūme Kogona’ya ve bâkī beş sehmi mesfûr Londari’ye isâbeti tahakkukundan sonra arzuhâl eden merkūme Kogona ve li-ebeveyn karındaşı merkūm Londari derûn-ı arzuhâlde ismi mezkûr Kostantin zimmîden mûrisimiz hâlik-i mesfûr Foti’yi mahalle-i mezbûrede vâki‘ sâkin olduğu menzilinde ahşam namazına karîb keser ile ağzına ve işbu mu‘âyene olunan beyâz saplı bıçak ile sol memesine amden bi-gayr-ı hakkın merkūm Kostantin darb ve cerh ve müteessiren hâlik olmağla mûcib-i şer‘îsini taleb ederiz deyü ba‘de’d-da‘vâ ve’l-inkâr mezbûrân müdde‘âlarını lede’t-tezkiye adâletleri zâhir Kiremit mahallesi ahâlîsinden Kostantin v. Zakırı ve İstavri v. Mihal ve zikr olunan Kâtib Muslihiddin mahallesinden Kürekci Manol v. Dimitri ve Sandalcı İstrati v. Mihal ve Dülger Yani v. Elviz nâm zimmîler şehâdetleriyle ba‘de’l-isbât ve’l-hükm katîl-i mesfûrun zevcesi merkūme Zakırı kātil-i merkūm Kostantin’in sulbiye kızı olup cüz’ü olmağla şer‘an takas lâzım gelmeyip hükm-i şer‘îsi diyete münkalib olmağla diyet-i kâmile olan on bin dirhem-i şer‘î gümüşden zevce-i mezbûrenin rub‘ hissesi iki bin beş yüz dirhem gümüşden mâ‘adâ müdde‘iyân-ı mezbûrânın ber-mûceb-i tashîh-i mezkûr hisselerine isâbet eden yedi bin beş yüz dirhem-i şer‘î gümüş müdde‘iyân-ı mesfûrân için vech-i şer‘î üzere edâya kātil-i merkūm Kostantin zimmîye tenbîh olunduğu huzûr-ı âlîlerine i‘lâm olundu. Fî 23 min-şehri Rebî‘ülâhir sene 1153.