Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 573 Hüküm no: 804 Orijinal metin no: [90a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmekçi İsmail’in fırınında ekmek pişirmesine kimse tarafından müdahalede bulunulmaması Bâ-mühr-i efendi Mevlevîhâne Yenikapısı hâricinde Merkez Efendi mahallesinde vâki‘ ekmekçi fırınının sâhibi el-Hâc İsmail meclis-i şer‘de derûn-ı arzuhâlde isimleri mezkûr olup İstanbul’da Mimâr Çarşısı kurbünde ekmekci Matos ve Şehremîni Çarşısı’nda hâs fırında ekmekci Avanes zimmîler muvâcehelerinde kadîmü’l-eyyâmdan bu âna dek mahalle-i mezkûrede vâki‘ fırınımda nân tabh olunagelip bir dürlü ta‘arruz olunmadığından mâ‘adâ mahalle-i mezkûre ve civârında vâki‘ mahallât ahâlîleri bundan akdem zikr olunan iki aded fırınların hâric-i kal‘ada vâki‘ iskemlelerinde ancak gündüz ekmekleri bulunup eyyâm-ı şitâda husûsan leyâlî-i mübârekede nân iktizâ eden fukarâ ve zu‘afâ zahmet çekip tereffüh-i ibâdullah için âhardan kimesne müdâhale etmeyip kadîmden nân tabh olunageldiği vech üzere fırın-ı mezkûrda nân tabh olunması’çün ahâlî-i mahallât iltimâslarıyla sâdır olan tuğrâlı fermân-ı cihân-mutâ‘ mûcebince hâlâ ben mahalle-i mezkûrede vâki‘ fırınımda nân tabh ederken mezkûrân iskemlelerine kesâd îrâs etmemek için beni men‘ murâd ederler deyü takrîr ve takrîr-i meşrûhunda mutâbık tuğrâlı emr-i âlî ibrâz ettikde zimmiyân-ı mesfûrân dahi cevâblarında mezbûr el-Hâc İsmail’e dahl ü ta‘arruz ve bir dürlü nizâ‘ımız yokdur dediklerinden sonra arzuhâl eden mahallât ahâlîlerinden otuz nefer mazbûtü’l-esâmî kimesneler dahi mezbûr el-Hâc İsmail’in takrîr-i meşrûhunu haber verdiklerinde derûn-ı emr-i âlî mûcebince zikr olunan fırında kemâ-kân nân-ı azîz tabh olunmasına âhardan kimesne müdâhale etmemek için tekrâr tuğrâlı emr-i âlî iltimâs eyledikleri huzûr-ı âlîlerine i‘lâm olundu. Bâkī emr ü fermân hazret-i veliyyü’l-emrindir. Hurrire fî 24 min-şehri Rebî‘ülâhir sene 1153