Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 355 Hüküm no: 520 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Beşe b. Abdullah’ın azat ettiği cariyelerine bazı eşyalarını hibe ettiği Mahmiye-i İstanbul’da Hoca Hamza Mahallesi’nde sâkin Sinan Beşe b. Abdullah nâm râcil meclis-i şer‘-i hatîr-i lâzımü’t-tevkīrde Çiçek bt. Abdullah ve Şemsisima bt. Abdullah ve Badıseher bt. Abdullah nâm câriye-i mu‘takaları taraflarından ikrâr-ı âti’z-zikri tasdîka vekîlleri olup Ali Efendi b. Mustafa ve İsmail Çelebi b. İbrahim Efendi şehâdetleri ile şer‘an vekâleti sâbit olan işbu bâ‘isü’l-kitâb Mehmed Beşe b. Mustafa mahzarında ikrâr-ı tâm ve takrîr-i kelâm edip silk-i mülkümde münselik olan eşyâmdan beynimizde ilm-i şer‘î ile ma‘lûm bir ayaklı sahan ve bir müsta‘mel yemenî yorgan bir müsta‘mel çatma yasdık ve bir müsta‘mel kapama ba‘de’l-ifrâz mezbûre Çiçek’e ve yine beynimizde ma‘lûm bir ayaklı sahan ve bir yemenî yorgan ve bir çatma yasdık ve bir bogası kapama ba‘de’l-ifrâz mezbûre Şemsisima’ya ve yine beynimizde ma‘lûm bir ayaklı sahan ve bir yemenî <> yorgan ve bir çatma yasdık ba‘de’l-ifrâz mezbûre Badıseher’e hibe ve temlîk edip onlardan herbiri kendüye hibe ve teslîm ve [zikr] olunan eşyâyı meclis-i hibede ittihâb ve kabûl ve kabz ve temlîk eylediler, ba‘de’l-yevm herbirine teslîm eylediğim eşyâ mülk-i mevhûbları olmuşdur, keyfe mâ yeşâ’ mutasarrıfe olsunlar, mukırr-ı mezbûru ikrâr-ı meşrûhunda el-mukarru lehü’l-mezbûr Mehmed Beşe bi’l-vekâle tasdîk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Musa b. Hüseyin el-bevvâb-ı sultânî, İsmail Çelebi b. İbrahim, el-Hâc Resül b. Abdurrahman, Ahmed b. Siyavuş, Ali Bey b. Mehmed, İbrahim b. Halil, Halil Beşe b. Pîrî, Oruc b. Kemal, Vefâyî Abdullah b. ( ), Hüseyin b. Abdullah ve gayruhum mine’l-huzzâr.