Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 577 Hüküm no: 812 Orijinal metin no: [91a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Tahir Efendi’ye babasından kalan evin Hasan Paşa Vakfı’na ait olduğunun ispatlanamadığı Fermân-ı âlîlerine imtisâlen derûn-ı arzuhâlde mastûr İstanbul’da Zincirlikuyu kurbünde Ali Paşa-i atîk mahallesinde Üsküdar’dan ma‘zûlen vefât eden Mahmud Efendi’nin veresesi sâkin olduğu menzile varıp mahalle-i mezbûre imâmı ve sâir Müslimîn ile taht-ı nezâret-i âsafânelerinde âsûde olan evkāf-ı şerîfelerinin müfettişi olan müderrisîn-i kirâmdan el-Hâc İbrahim Efendi ve hâlâ Harameynü’ş-şerîfeyn müfettişi müderrisîn-i kirâmdan Derviş Mustafa Efendi dâ‘îleriyle bu dâ‘îleri akd-i meclis-i şer‘-i şerîf ettiğimizde mahmiy-i mezbûrede sâkine Emetullah Hatun bt. Mehmed Efendi nâm hatunun sadriye kebîre kızı ve tarafından vekîl-i sâbitü’l-vekâlesi sâhibe-i arzuhâl Saliha bt. İshak nâm hatun vekâleten ve ashâb-ı hayrâtdan merhûm es-Seyyid Hasan Paşa Vakfı’nın mütevellîsi Salih Çelebi tevliyeten meclis-i ma‘kūd-ı mezbûrda müteveffâ-yı mezbûr Mahmud Efendi’nin veresesinden kebîr oğlu es-Seyyid Mehmed Tahir Efendi muvâcehesinde her biri bi’t-tevliye ve bi’l-vekâle da‘vâ ve takrîr-i kelâm edip müvekkile-i mezbûre Emetullah’ın yedinde olan işbu temessük mantûkunca lede’l-ahâlî ve’l-cîrân ma‘lûmü’l-hudûd ve’l-müştemilât işbu akd-i meclis-i şer‘ olunan menzil-i mezbûrun hâriciyesi merhûm-ı mezbûr es-Seyyid Hasan Paşa Vakfı ve müvekkile-i mezbûre Emetullah’ın bi’l-icâreteyn taht-ı tasarrufunda olup ber-vech-i muharrer vakıf olduğuna semâ‘la şâhidlerimiz var iken menzil-i mezbûrun hâriciyesinde mezbûr es-Seyyid Mehmed Tahir Efendi ile sâir verese bi-gayr-ı hakkın vaz‘-ı yed ederler suâl olunup asl-ı vakfdan semâ‘la şehâdet câiz olmağla şâhidlerimiz istimâ‘ olunup yedlerinden nez‘ ve vakf olmak üzere bize teslîme tenbîh olunmak matlûbumuzdur deyü ba‘de’d-da‘vâ ve’s-suâl mezbûr es-Seyyid Mehmed Tahir Efendi cevâbında menzil-i mezbûrun ittisâlinde olup külhân kapısı olan mahallin arsası merhûm-ı mezbûr es-Seyyid Hasan Paşa Vakfı’ndan olmağla ancak on sekiz zirâ‘ havâyî hâriciye-i menzilden şehriye elli akçe icâre-i müeccele ile vakıf ve mâ‘adâ hâriciye ve dâhiliyesinin mecmû‘u arsa ve binâsına mukaddemâ merhûm Sallabaşzâde Hasan Efendi sinîn-i müte‘addidde mülkiyet üzere zabt ve ba‘dehû muhterik oldukda yine mezbûr ber-vech-i muharrer mülkü olmak üzere ba‘de’l-binâ âhardan bâ-hüccet-i şer‘iyye Sarrâf Karabet’e mülkiyet üzere ba‘de’l-bey‘ ol dahi mülkiyet üzere mutasarrıf oldukdan sonra babam müteveffâ-yı mûmâ-ileyh dahi mülkiyet üzere bâ-hüccet-i şer‘iyye mezbûr Karabet’den iştirâ ve bir müddet mülkü olmak üzere tasarrufundan sonra fevt oldukda irsen bizlere intikāl etmişdir, menzil-i mezbûr bizim ber-vech-i muharrer şirâen ve irsen mülkümüz olup vakıf olduğu ma‘lûmumuz değildir deyü bi’l-külliye vakfiyetini inkâr edicek husûs-ı mezkûrda vakıf beyyinesi evlâ ve mülkiyet üzere tasarruf müstenid-i şer‘îye mebnî olmağla mezbûr es-Seyyid Mehmed Tahir Efendi’nin yedinde olan fetvâ-i şerîfe mantûkunca şer‘an asl-ı tescîl-i vakfa beyyine lâzım olup semâ‘la şehâdet câiz olmamağla mütevellî-yi mezbûr Salih Çelebi’den ve vekîl-i merkūm Saliha Hatun’dan asl-ı vakfın tescîline beyyine taleb olundukda yüz elli seneden mütecâviz zamân mürûr eden vakfın tescîline bir tarîkle şâhidimiz olmayıp yedimizde vakfiye dahi yokdur deyü kemâl-i mertebe ızhâr-ı acz edip yemîne dahi tâlibler olmamalarıyla mütevellî-yi mezbûr ile vekîl-i merkūm Saliha Hatun bilâ-beyyine mu‘ârazadan ba‘de’l-men‘ Bâb Mahkemesi’nde tescîl ve huzûr-ı devlet-mahsûr-ı sa‘âdet-mevsûrlarına i‘lâm olundu. El-emru li-men-lehü’l-emr. Fî 26 min-şehri Rebî‘ülâhir sene 1153.