Bab Mahkemesi 172 Numaralı Sicil (H. 1152-1153 / M. 1740) cilt: 69, sayfa: 578 Hüküm no: 813 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fakirliği sebebiyle İsmail’e olan borcunu ödeyemediğinden hapsedilen Nikola’nın tahliyesi Ma‘rûz Derûn-ı derkenârda mezkûrü’l-ism es-Seyyid el-Hâc İsmail nâm kimesneye ber-mûceb-i i‘lâm üç yüz yetmiş iki guruş deyni için yüz on gün sicn-i sultânîde mahbûs olan sâhib-i arzuhâl Nikola v. Paradon zimmî Mahkeme-i Bâb’da meclis-i şer‘de dâyin-i merkūm es-Seyyid el-Hâc İsmail ile terâfü‘lerinde mezbûr Nikola meblağ-ı mezbûru hâlâ ve def‘aten edâya iktidârım yokdur deyü asârını da‘vâ ve merkūm es-Seyyid el-Hâc İsmail dahi mezbûrun yesârını da‘vâ ettikde beyyine-i yesâr evlâ olmağla yesârına beyyinesi talebiyle merkūm es-Seyyid el-Hâc İsmail bi’d-defa‘ât imhâl olundukda her def‘ada müddet-i mehl tamâm olup ityân-ı beyyineye kādir olmayıp ızhâr-ı acz etmekle mezbûr Nikola’dan asârına beyyine taleb olundukda mezbûr Nikola meblağ-ı mezbûru hâlâ ve def‘aten edâya iktidârı olmayıp mu‘dim ve mu‘sir ve müflis olduğunu sekiz nefer müseccelü’l-esâmî Müslimîn ihbârlarıyla sâbit edip si‘at-i hâle değin habsi meşrû‘ olmamağın medyûn-ı mezbûr Nikola’nın habsden ıtlâkı şer‘an iktizâ eylediği huzûr-ı âlîlerine i‘lâm olundu. Fî 28 min-şehri Rebî‘ülâhir sene 1153.