Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 356 Hüküm no: 521 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Beşe b. Abdullah’ın bazı eşyalarını Mehmed Beşe ile hanımı Bağıcinan’a hibe ettiği Mahmiye-i İstanbul’da Hoca Hamza Mahallesi’nde sâkin Sinan Beşe b. Abdullah meclis-i şer‘-i hatîrde ikrâr-ı âti’l-beyânı tasdîka kendi tarafından asîl ve zevcesi Bağıcinân bt. Abdullah tarafından vekâleti Ali Efendi b. Mustafa ve İsmail b. İbrahim şehâdetleri ile sâbit olan işbu bâ‘isü’l-kitâb Mehmed Beşe b. Mustafa mahzarında ikrâr edip silk-i mülkümde münselik olan eşyâmdan beynimizde ma‘lûm bir sancaklı münakkaş üsküf ferâce ve bir kırmızı iskarlet çakşır ve dört müsta‘mel sarık ve üç müsta‘mel kadife kavuk ve bir kırmızı diz çakşırı ba‘de’l-ifrâz merkūm Mehmed Beşe’ye hibe ve temlîk edip ve yine beynimizde ma‘lûm bir ayaklı sahan ve bir yemenî yorganı ve bir sagīr çatma yasdık ve bir müsta‘mel bogasi kutnî ba‘de’l-ifrâz müvekkilesi Bağıcinân’a hibe ve temlîk edip herbiri dahi hibe eylediğim eşyâ-i mezkûreden meclis-i hibede ittihâb ve kabûl ve kabz ve temlîk eyledikden sonra herbininin tesellüm eylediği eşyâ mülk-i mevhûbları olmuşdur, keyfe mâ yeşâ’ mutasarrıf olsun dedikde mukırr-ı mezbûru ikrâr-ı meşrûhunda el-mukarru lehü’l-merkūm Mehmed Beşe bi’l-asâle ve bi’l-vekâle vicâhen tasdîk etmeğin mâ-vaka‘a bi’t-taleb ketb olundu. Tahrîren fi’l-yevmi’s-sâbi‘ aşer min-Zilhicceti’ş-şerîfe li-sene erba‘a ve sittin ve elf. Şuhûdü’l-hâl: Hüseyin b. Abdullah, el-Hâc Mustafa Ağa dâmâd-ı Siyavuş Paşa, Ahmed Bey b. Siyavuş, Musa Ağa b. Hüseyin el-bevvâb-ı sultânî, el-Hâc Eyüb b. Abdurrahman, Ali Bey b. Mehmed ve gayruhum mine’l-huzzâr.